Rusiye Devlet dumasınıñ işğal etilgen Qırım deputatı Ruslan Balbekniñ adı Jenevada keçirilgen İnsan aqları, demokratiya ve uquq üstünligi meseleleri Forumınıñ kün tertibinde qayd etilmedi. BM saytında Balbekniñ çıqışı aqqında malümat ya da çıqışınıñ videosı yoq. Bu aqta Ukraina haber siyaseti naziriniñ birinci muavini Emine Ceppar bildirdi.
Onıñ aytqanına köre, forum teşkilâtçıları – Baş kâtip Martin Çungong yolbaşçılığındaki parlamentlerara birlik, «BM resmiy saytında olmağan videolar qanuniy ve resmiy sayılamaz», dep qayd etken edi.
Bunı Ceppar, Ruslan Balbek Jenevada keçirilgen İnsan aqları, demokratiya ve uquq üstünligi meseleleri Forumında iştirak etip çıqışta bulunğanını iddia etken soñ bildirdi.
«Jenevadaki BM Ukraina temsilciligi Parlamentlerara birlik reberligi ve BM insan aqları yuqarı komissarınıñ idaresinen körüşüvler keçire. Ukrainanıñ fikirleri deñişmey: Dumanıñ işğal etilgen Qırım «deputatları» BM tedbirlerinde ve halqara teşkilâtlarnıñ diger resmiy platformalarında iştirak etemez. Sözlü beyanat bütün taraflarğa berilecektir», – dep yazdı Ceppar Facebookta.
Bundan evel Ukraina haber siyaseti naziriniñ birinci muavini, Ruslan Balbek Rusiye eyyetiniñ erkânında bar edi, amma forumda çıqışta bulunmadı ve forumda söz alğan Rusiye vekili Qırım temsilcisi olğanını aytmadı, dep bildirgen edi.
Forum vesiqalarında Ruslan Balbekniñ adı yoq.
Qırım.Aqiqat, Ruslan Balbekniñ Ukraina haber siyaseti naziriniñ birinci muavininiñ malümatınen bağlı izaatlarını almağa tırışa. Matbuat kâtibi vaziyetni izaatlamay, Balbekniñ özü ise telefonda cevap bermey.
Rusiye Devlet dumasınıñ işğal etilgen Qırım deputatı Ruslan Balbek, insan aqları, demokratiya ve uquq üstünligi meselelerine bağışlanğan BM tedbirlerinden birinde iştirak etkenini bildirdi.
Sentâbrniñ 11-nde Varşavada keçirilgen OSCE konferentsiyasında Ukraina eyyeti Qırımnıñ eki Rusiye «vekiline» çıqışta bulunmağa imkân bermedi. Rusiye kütleviy haber vastalarınıñ malümatına köre, daa soñra konferentsiyada Rusiye kontrolindeki Qırımnıñ bulğar milliy-medeniy muhtariyetiniñ vekili İvan Abajer çıqışta bulundı.
Emine Ceppar, Ukraina akimiyeti Qırım «vekilleriniñ» Varşavadaki OSCE konferentsiyasında iştirak etmek içün Şengen alanınıñ sıñırlarından angi vesiqalar esasında keçkenini teşkere.
Ceppar, Varşavadaki OSCE toplaşuvında iştirak etken işğal altındaki Qırımnıñ Rusiye kütleviy haber vastaları «gibrid cenki çerçivesinde areket etti», dep tüşüngenini bildirdi.
