Martnıñ 2-nde Jenevada BM İnsan aqları 49-ıncı sessiyasında Ukraina tış işler naziriniñ birinci muavini Emine Ceppar Rusiyeniñ Ukrainağa ücüm etüvi ve aqibetleri aqqında tarif etti.
Çıqış online oldı: Ceppar, Ukraina Nazirler şurasınıñ banneri ögünde turdı ve Ukraina ükümeti çalışa, dep qayd etti.
«Yedi kün evelsi memleketim bam-başqa kerçeklikte uyandı. Kiçkene qızçıq Kyivde, esli-başlı adam Mariupolde, qoranta çifti Çerniğivde — episi qorqtı. Olar ücüm sebebinden qaçmağa mecbur oldı. Bu Avropanıñ merkezinde 21-inci asırda oldı, — dep başladı Ceppar. — Fevralniñ 24-nde saba saat 4-te Beyazrusiye Cumhuriyeti qoltutqan Rusiye Federatsiyasınıñ silâlı quvetleri Ukrainağa bütün küçnen er taraftan ücüm etti».
Nazirniñ birinci muavini fevralniñ 24-nde saba özü de patlav sesinden uyandı, dep ayttı.
«Pencerege çapıp bardım ve o gece qalğan yerim yaqınında ateş kördim. Ve o vaqıt añladım: cenk başlandı», — dedi Ceppar.
Ceppar, ordu, Rusiye aytqanı kibi, tek infrastruktura obyektlerine degil, vatandaş obyektlerine de ücüm ete. O, Rusiye ordusı yapqan büyük viraneler aqqında hatırlattı. Evlerini terk etmege mecbur olğan yüz biñlernen ukrainalı aqqında tarif etti.
«16 balanen beraber 352 insan elâk oldı, öldürildi. Eñ kiçigi 18 aylıq edi. Biñlernen kişi Rusiyeniñ Ukrainağa ücüminiñ altı künü içinde yaralandı», — dep tarif etti Ceppar.
O, Rusiye ücümi neticesinde tek Ukraina vatandaşları elâk olmadı, dep qayd etti.
«Şimdi közyaş tökecek vaqtımız yoq. Ğalebe qazanğan soñ bunı mıtlaqa yaparmız. Ve sevimli insanımıznı quçaqlağanda baht közyaşlarımız peyda olacaq. Ava darbeleri ve ücümden viran olğan şeerlerni ğayrıdan tiklep başlağanda», — dedi Ceppar.
Martnıñ 2-nde Birleşken Milletler Baş assambleyasınıñ Mahsus sessiyası Rusiyeniñ Ukrainağa sebepsiz ücümini «qararlı bir şekilde» takbih etken rezolütsiyağa rey berdi.
Rey berüv fevralniñ 24-nden berli devam etken Rusiye bombardımanları ve ava darbeleri sebebinden keçirildi. Devlet fevqulâde vaziyetler hızmetiniñ malümatına köre, eki biñ vatandaş elâk oldı, yüzlernen Ukraina vatandaşı qaçaq oldı, dep aytıla BM malümatında.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net.
Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
