Ukraina Tış işler naziriniñ birinci muavini Emine Ceppar BM insan aqları Şurasınıñ 45-inci sessiyası çerçivesinde online çıqış yapıp, «Rusiye elinde suv silâ ola», dep qayd etti.
«Körgenimiz kibi, şimdi Qırım özenlerini barbarca qazğan Rusiyeniñ elinde suv silâ ola – em qoruma altındaki şahıslarnı qorquzuv vastası, em artqan işğalci maşinağa qol tutuv aletidir. Arbiy infrastruktura ve arbiy-sanayı obyektleriniñ inkişafı, asker sayısınıñ arttırılması ve Rusiye vatandaşlarınıñ işğal etilgen Qırımğa faal yerleştirilmesi suv resurslarına olğan ihtiyac artmasınıñ sebebi ola. Yerli ealiniñ ihtiyacları ise prioritet degil. İnsanlar Rusiye içün bir vaqıt prioritet olmadı. İşğalcini tek bir şey meraqlandıra – hayırsız geopolitik ambitsiyalarını yerine ketirmek içün topraq ve deñiz», – dedi Ceppar.
Rusiye akimiyeti Cepparnıñ beyanatına resmiy şekilde cevap bermedi.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Sentâbrniñ 28-nde Aksenov quyularını «qullanmağan bermegen» saiplerden suv quyularını mecburiy satın aluv aqqında emir berdi.
BM Ukraina Monitoring missiyası Qırım yarımadasınıñ işğaline esaslanıp, «Rusiye Qırımda qorçalanğan insanlarnıñ suvnen temin etilüvinden mesüliyetlidir», dep israr ete.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
