Şarqiy yönelişte Ukrayına Mudafaa quvetleri keçken afta 9 kilometr kâre, cenüpte 28 kilometr kâre azat etti, dep tarif etti Ukrayına mudafaa naziriniñ muavini Ğanna Malâr.
Onıñ malümatına köre, Ukrayına şarqında em ücüm, em imaye areketleri devam ete – Ukrayına Mudafaa quvetleri Bahmut yönelişinde areket ete, Rusiye ordusı ise Liman, Avdiyıvka ve Maryinka yönelişlerinde ücüm etmege devam ete.
«Duşman ordumıznı çetleştirmege tırışa, amma lâyıq bir tirenüv ala. Şimdi anda zor uruşlar devam ete. Keçken afta operativ (taktik) vaziyet eyilişkeni içün ve cebe tizleşkeni içün azat etilgen topraq 9 kilometr kâre arttırıldı», – dep qayd etti nazir muavini.
Ukrayına silâlı quvetleri Novodarivka, Priyutne, Novodanılivka, Robotıne, Novoseli ve Staromayıorske yönelişlerinde muvafaqiyetli şekilde ücüm ete, dep ayta Malâr.
«Keçken afta azat etilgen topraq 28,4 kilometr kârege arttı. Umumen cenüpte azat etilgen topraq 158,4 kilometr kâre ola», – dep qoştı memur.
Ukrayına Mudafaa nazirliginiñ malümatına köre, Bahmut yönelişinde keçken aftanıñ soñundan berli ücüm areketleri devam ete – Ukrayına arbiyleri er kün ileriley. Aynı vaqıtta, mudafaa naziriniñ muavini Ğanna Malâr añlatqanına köre, Bahmutnıñ işğalden qurtaruv esnasını zorlaştırğan bir hususiyeti bar – o yerde inkişaf etken müendislik inşaatları sisteması ve Rusiye ordusı vaqtınca zapt etken istinat noqtalarınıñ ağı bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
