Cenübiy Koreya istihbaratı, Ukrayina arbiyleri Ukrayinağa qarşı Rusiye tarafında cenkleşken Şimaliy Koreya askerini esir alğanını tasdıqladı. Bunı "Rönhap" agentligi bildire.
"Dost memleketniñ istihbarat teşkilâtı ile kerçek vaqıt rejiminde malümat almaşuvı sayesinde yaralanğan Şimaliy Koreya askeriniñ tutuluvı tasdıqlandı", — dep haber agentligi Cenübiy Koreyanıñ Milliy istihbarat hızmetiniñ beyanatından alıntı ketire.
AFP haber agentliginiñ malümatına köre, Cenübiy Koreyanıñ istihbarat hızmetinde, şimaliy Koreya askeri ne yerde tutuldı, belli degil.
Şimaliy Koreya arbiy adamınıñ fotoresimi dekabrniñ 26-nda aqşam "Mіlitarnıy" telegram kanalı tarafından derc etildi. Yazıda qayd etilgenine köre, arbiy quvetler "KDNR ordusınıñ birinci askerini esir aldı". Ukrayina akimiyeti bu malümatnı daa izaatlamadı.
Cenübiy Koreya istihbaratınıñ malümatına köre, Rusiyeniñ Kursk vilâyetinde ukrayin quvetleri ile uruşlarda eñ azdan 100 Şimaliy Koreya askeri elâk oldı, daa biñ kişi yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
