Almaniya kantsleri Olaf Şolts Rusiyeniñ Ukrayinağa arbiy istilâsı başlamazdan evel, o, Rusiye prezidenti Vladimir Putinni Ukrayinanıñ yaqın 30 yıl devamında NATO azası olmaycağına inandırğanını bildirdi. Bunı Die Welt haber ete.
Şoltsniñ sözlerine köre, o, Putinge NATO-nıñ Moskva içün iç bir vaqıt tehdit yaratmağanını ve Alyansnıñ Rusiyeniñ menfaatlarına emiyet bermegenine dair qabaatlarnı red etkenini aytqan. Almaniya kantsleri Ukrayinağa qarşu büyük istilânıñ sebebini "tamamınen samçalıq" dep saya.
Şolts Putin ile ne zaman qonuşqanını aytmağan. Soñki sefer Almaniya ve Rusiye liderleri dekabrniñ 21-nde telefondan laf etken ediler. Fevralniñ 15-nde Şolts Putin ile Moskvada körüşken edi.
Rusiyeniñ Ukrayinağa büyük istilâsınıñ delillerinden biri dersiñ NATO-nıñ Ukrayinanı anti-Rusiye forpostuna çevirmek istememi edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
