Ukrayınadaki cenkte Ukrayına ordusında askerlik yapqan 20 yaşında Edem Aliyev elâk oldı. Bu aqta Qırımtatar Milliy Meclisiniñ reisi Refat Çubarov bildirdi.
Onıñ aytqanına köre, Ukrayına arbiyi Donetsk vilâyetindeki Bahmut civarında cenkleşip elâk oldı.
«Qırımtatar Milliy Meclisi askerniñ babası Nariman Aliyevnen bağda buluna. Cenaze künü ve yeri aqqıda malümat berilecek», – dep qayd etti Çubarov.
Daa evel belli olğanına köre, Zaporijjâ yönelişinde aqyarlı Vsevolod Grabar elâk oldı. O, Şevçenko Kyiv milliy universitetiniñ coğrafiya fakültetiniñ geodeziya ve haritaşınaslıq kafedrasınıñ mezunı ola. Apayı ve eki balası qaldı.
2022 senesi dekabr ayınıñ soñunda Lugansk vilâyetinde qırımlı, vatandaş faali, sabıq siyasiy mabüs Gennadiy Afanasyev (tahallüsi «Tor») elâk oldı, dep haber etildi. O, Ukrayına Silâlı quvetleriniñ 241-inci brigadasınıñ territorial mudafaasınıñ 130-ıncı batalyonında cenkleşti. Afanasyev Rusiyeniñ Ukrayınağa qarşı arbiy istilâsınıñ ilk künü arbiy komissarlıqqa ketti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
