Amerika Birleşken Devletlerinde bulunğan Ukrayina prezidenti Volodımır Zelenskıy ABC telekompaniyasına intervyü berip, Rusiye başlatqan cenkniñ soñu «çoqları tüşüngeninden daa yaqın» olğanını ayttı.
Tolu intervyü telekanalda sentâbrniñ 24-nde Amerika saatınen saba yayınlanacaq. İlânda berilgen qısqa parçalarda Ukrayina prezidenti sentâbrniñ 26-nda ABD prezidenti Joe Bidenge taqdim etecek ğalebe planı «Ukrayinanı quvetleştirüvden» ibaret: «Şunıñ içün dostlarımızdan, ittifaqdaşlarımızdan bizni quvetleştirmege rica etemiz. Bu pek müim».
«Mence, bir çoq insan tüşüngeninden barışıqqa daa yaqınmız. Cenk soñuna daa yaqınmız», – dep qayd etti Volodımır Zelenskıy. Zafer planında Rusiye ile muzakereler barmı ve Rusiyege işanmağa azırmı sualine Ukrayina prezidenti barışıq planı Rusiye ile muzakereler aqqında degil, dep cevap berdi. O, onı zıddiyetniñ diplomatik yollarnen al etilüviniñ köprü dep adlandırdı. Teklif Ukrayinanı quvetleştirüvden ibaret.
«Tek küç tarafından Putinni diplomatiya vastasınen barışıqqa ittire bilemiz», – dedi Zelenskıy. Onıñ aytqanına köre, Ukrayinanıñ Kursk vilâyetinde keçirgen arbiy operatsiyası Putinni qorquza, çünki rusiyeliler memleketini imaye etip olamağanını kördi.
Sentâbrniñ 25-nde Volodımır Zelenskıy New York BM Baş Assambleyasınıñ sessiyasında çıqış yapacaq. Bir çoq memleketniñ yolbaşçılarınen körüşüvleri planlaştırılğan, bazılarını sentâbrniñ 23-nde endi keçirdi. Ukrayina prezidenti Almaniya kantsleri, Yaponiya ve İndistan baş nazirleri, Paragvay prezidenti, em de ABD Kongressiniñ eki firqalı eyyetinen laqırdı etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
