Qırımnıñ Rusiye yolbaşçısı Sergey Aksenovnıñ bildirgenine köre, Rusiyeniñ Ukrayınağa qarşı cenkte iştirak etken qırımlı Rusiye arbiylerine Saq ve Aqmeçit rayonında topraq damartıları berilecek.
Aksenov, al-azırda «topraq damartılarınıñ fondu şekillendirile», dep ayta, dep haber ete RİA «Krım» Rusiye haber agentligi.
«Metre kâresi umumiy ihtiyacnıñ yarısını teşkil etken topraq damartıları Saq ve Aqmeçit rayonlarında bar», – dep yazdı Aksenov Telegram kanalında.
Onıñ aytqanına köre, bu topraqlar deñizge yaqın, anda «suv borusı ve elektrik hatları yapılacaq, yollar qurulacaq ve yañıdan yapılacaq».
Rusiye Mudafaa nazirligi «mahsus arbiy operatsiyada» (Rusiye Ukrayınadaki cenkni böyle adlandıra – QA) iştirak etkenleri içün mukâfatlandırılğan arbiyler ve uquq qoruyıcı qurulışlarnıñ hadimlerine Qırımda topraq bermege teklif etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
