Rusiyeniñ Ukrayinağa keniş mıqyaslı istilâsına narazılıq bildirip, Puşkino köyüniñ memuriyet binasına Molotov kokteyli atmaqnen şübeli sayılıp, tevqif etilgen Qırımnıñ İçki rayonınıñ 25 yaşındaki sakini tazyıq altında özüne qarşı şaatlıq etti. Bunı Facebook qullanıcısı Elmaz Qırımlı bildirdi.
"Videoda menim eki doğmuş qardaşım Aziz Fayzullayevdir. Video advokatsız yazılğan. Al-azırda ne Aziznen, ne de onıñ ana-babası ile bağlanamayım. Azizni yaqaladılar. Onıñ tazyıq altında olğanına şübem yoq. Sesi kesile, bütün vaqıt ellerini bura, közü altında qoyu daireler bar, o azır metinni oquy. Aziz nasıl laf etkenini, cümlelerni nasıl tizgenini, nasıl ibarelerni qullanğanını men bilem", - dep yazıla bildirmede.
Elmaz Qırımlınıñ sözlerine köre, al-azırda yaqalanğan kişi Qırımnıñ İçki rayonınıñ Muvaqqat tutuv izolâtorındadır.
İyünniñ 8-nde Puşkino köyüniñ memuriyet binasına Molotov kokteyli atmaqnen şübeli sayılıp Qırımnıñ İçki rayonınıñ 25 yaşındaki sakini tevqif etildi.
Yaqalanğannıñ özü bildirgeni kibi, bunı Rusiyeniñ Ukrayinağa keniş mıqyaslı istilâsına narazılıq bildirip yapqan.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
