Al-azırda Qırımğa esas Ukrainadan tek Ukraina pasportlarınen kirmek mümkün, dep bildirdi Ukraina Devlet sıñır hızmetiniñ Kütleviy haber vastalarınen bağ meseleleri Azaq-Qara deñiz regional idaresiniñ yolbaşçı muavini Maksim Soroka. Onıñ aytqanına köre, Qırımğa daa evel qanunğa uyıp barğan çetel vatandaşları esas Ukrainağa keçiş noqtalarından qayta bile.
Prezident Petro Poroşenko jurnalistlernen subetleşip, cenk vaziyeti sebebinden peyda olğan sıñırlavlar Ukraina vatandaşlarına pek tesir etmeycek, amma diger memleketlerniñ vatandaşları, hususan Rusiye vatandaşları içün tesirli olacaq, dep bildirdi. Bundan ğayrı, cenk vaziyetinde Qırımğa yaqın Herson vilâyetinde askerlerniñ sayısı arttırıldı.
Ukraina Devlet sıñır hızmetiniñ Kütleviy haber vastaları ile bağ meseleleri bölüginiñ reberi Andriy Demçenkonıñ qayd etkenine köre, Qırımğa kirgen bazı rusiyeliler içün istisna olacaq.
Çetel vatandaşları kirsetilmeycek, faqat bundan evel qanunğa uyğun bir şekilde Qırımğa kelgenler, şu cümleden Rusiye vatandaşları, qayta bileAndriy Demçenko
– İşğal etilgen yarımadağa taba tek Ukraina vesiqalarınen çıqmaq mümkün. Çetel vatandaşları kirsetilmeycek, faqat bundan evel qanunğa uyğun bir şekilde Qırımğa kelgenler, şu cümleden Rusiye vatandaşları, qayta bile. Kütleviy haber vastaları, aq qorçalayıcı teşkilâtlar ve gumanitar missiyalarnıñ vekilleri içün yarımadağa kirgende bile istisna yapıla bile. Eskiden olğanı kibi, çetel vatandaşı Qırımğa kire bilmek içün Devlet köç hızmetinden izin almalı. Lâkin şimdi bazı keçiş noqtalarında ayrı qararlar alına bile – cenk vaziyetiniñ uquqiy rejimine dair qanunlar çerçivesinde.
Andriy Demçenkonıñ qayd etkenine köre, Ukraina Devlet sıñır hızmetiniñ bütün bölükleri vaziyetniñ kerginleşmesine ve istilâğa qarşılıq köstermek içün qısqa vaqıtta bütün resurslarnı birleştirmege azır.
Çaplınka rayon devlet memuriyetiniñ yolbaşçısı Oleksandr Bureykonıñ aytqanına köre, cenk vaziyeti regionğa pek az tesir etti.
– Etrafımızda askerler ve tehnika çoq olğan rejimde yaşamağa alıştıq. Umumen bu apparat işimizniñ bazı memuriy taraflarınen bağlı. Ara-sıra Silâlı quvetler, Devlet sıñır hızmeti, diger uquq qoruyıcı organlarınıñ vekillerinen körüşemiz. Bu sefer işimizni faalleştirmek ve koordinatsiyanı eyileştirmek maqsadınen toplaştıq – reberler deñişti, şunıñ içün cenk vaziyetinde kimniñ ne vekâletleri bar ve ne yapmaq kerek, dep laf ettik.
Silâlı qurulışlar eksperti, Kyivdeki Ukraina telükesizlik hızmeti Baş idaresiniñ sabıq hadimi İvan Stupaknıñ fikirince, Rusiye vatandaşlarınıñ Ukrainağa kirişleriniñ sıñırlanması milliy telükesizlik içün müim ola.
Bu cenk vaziyeti – cenkniñ baş repetitsiyasıdır.İvan Stupak
– Tedbir alamız, qomşu memleketten insanlarnıñ kirişini başqaca yasaqlamağa mümkün degil. Bu memleketniñ mahsus hızmetleri bergen vazifelerini bizim toprağımızda eda etken insanlar kene de kele: bağ qurmaq, para yollamaq, bir de bir aktsiyalarnı maliye etmek içün keleler. Böyle «qarıncalar» içün çoqça sed qoymaq kerek. Şimdi bu aqım küçük bir irmaqqa qadar eksildi. Çetel jurnalistleriniñ belli bir vesiqaları olsa kire bileler – memleketteki vaziyetniñ yañlış aydınlatılmaması içün bu da kerek, çünki bizler de zarar köremiz. Rusiye kütleviy haber vastaları yahşı çalışa, olarnıñ jurnalistleri bizim toprağımızğa ne qadar az kelse, o qadar yahşı. Umumen alğanda, bu cenk vaziyeti – cenkniñ baş repetitsiyasıdır.
(Metinni Vladislav Lentsev azırladı)
Aleksandr Golubov, Qırım.Aqiqat Radiosınıñ alıp barıcısı
