Qırımnıñ Saq rayonında Ukrayınağa qarşı cenk iştirakçileri içün yañı topraqlar azırlandı, dep haber ete RİA Novosti Rusiye devlet agentligi Rusiye kontrolindeki Qırımnıñ mulk ve topraq munasebetleri naziri Larisa Kuliniçniñ malümatına esaslanıp.
Qayd etilgenine köre, bedava berilecek topraq içün 676 damartı azır.
«Qırımda «mahsus arbiy operatsiya» (Rusiye Ukrayınağa qarşı cenkni böyle adlandıra – QA) iştirakçilerine bedava berilecek yañı topraq yerleri şekillendirildi. Massiv Saq rayonınıñ Qart Biy (Ştormovoye) köy şurasında, Bölek Acı (Privetnoye) köyüne yaqın ve 676 topraq damartısından ibaret», – dep aytıla haberde.
Qırımnıñ Rusiye yolbaşçısı Sergey Aksenov Ukrayına ile cenk iştirakçileri Qırımda tahminen 730 topraq damartısını aldı, dep bildirdi.
2022 senesi dekabr ayında Qırımnıñ Rusiye parlamenti Ukrayınağa qarşı cenkte iştirak etken qırımlılarğa bedava topraq damartılarını bermege izin berdi. Aprelniñ 7-nde belli olğanına köre, Rusiye kontrolindeki Qırım akimiyeti Ukrayınağa qarşı cenk iştirakçilerine topraq damartılarını berüv fermanlarını berip başladı. TASS Rusiye agentliginiñ malümatına köre, başta umumen 56 gektarlıq 511 damartı azırlandı. Episi Saq rayonında yerleşe.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
