Ukraina prezidenti Volodımır Zelenskıynıñ CNN telekanalına bergen intervyüsında memleketiniñ silâlı quvetleri fevralniñ 24-nden berli ğayıp etkenleri aqqında bildirdi.
Zelenskıynıñ aytqanına köre, 2500-den 3000 biñge qadar arbiy elâk oldı, tahminen 10 biñ arbiy ağır yaralandı, «ve qaç kişi sağ qalır belli degil».
Cenkleşken taraflar ğayıpları aqqında siyrek haber ete. Martnıñ 25-nde Rusiye Mudafaa nazirligi cenk areketleri vaqtında 1351 Rusiye arbiyi öldi ve 3825 arbiy yaralandı, dep bildirdi. O vaqıttan berli Kreml ğayıpları aqqında bildirmedi.
Ukraina Mudafaa nazirliginiñ malümatına köre, Rusiye tarafınıñ ğayıpları tahminen 20 biñ insan oldı.
Arbiy ğayıplarğa mustaqil şekilde qıymet kesmek şimdilik zor. ABD istihbaratı martnıñ ortasında elde etken malümatına esaslanıp, Rusiye tarafınıñ ğayıpları 8-14 biñ ola, dep bildirgen edi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
