Qırım MC ve Aqyar şeeriniñ Prokuraturası Bağçasaray rayon mahkemesiniñ qadısına evel çıqarılğan şübe esabatında deñişmeler aqqında bildirdi. Devlet hainliginden ğayrı, bu qadı daa qırımtatar faalleriniñ taqip etilmesi ile qabaatlana.
Bunı avgustnıñ 11-nde idareniñ matbuat hızmeti haber etti.
«Yarımadanıñ işğalinden soñ, 2014 senesi qadı Ukraina halqına bergen sadıqlıq antına hiyanet etip qanunsız olaraq yaratılğan «Qırım Cumhuriyetiniñ Bağçasaray rayon mahkemesiniñ» reis muavini vazifesine tayin etildi. Daa soñra, şübeli areketleri ile yarımadadaki işğalci mahkeme organlarınıñ ve umumen Rusiyeniñ işğal akimiyetiniñ tiklenilmesine ve çetel devletiniñ vekillerine Ukrainağa qarşı yıqıcı faaliyetni ömürge keçirmege yardım etti», – dep yazıla bildirmede.
Prokuraturanıñ haber etkenine köre, bu qadı eki qırımtatar faaline üküm çıqarılmasında iştirak etken. Olarğa, 2014 senesi mayısnıñ 3-nde cemaat nizamını bozğanları içün 10-40 biñ ruble arasında para cezası berilgen edi. Faaller qırımtatar lideri Mustafa Cemilevge Qırımğa kirüv yasağına qarşı narazılıq bildirip, Aqmescit-Aqyar, Herson-Canköy-Kefe-Keriç, Aqmescit-Kefe-Keriç yollarını qapatqan eidler.
Yedi yıl evelsi, 2014 senesi mayısnıñ 3-nde, biñlernen qırımtatarı liderleri Mustafa Cemilevni qarşılamaq içün işğal etilgen Qırım ve Herson vilâyetiniñ memuriy sıñırına keldi. Bir kün ögüne Rusiye akimiyetiniñ Cemilevniñ Qırımğa kirişini yasaqlamaq qararı aqqında belli oldı.
Zırhlı tehnikası olğan Rusiye quvetçileri Ermeni Bazarnıñ «Turetskiy val» keçiş noqtasında qırımtatarlarnıñ avtokolonnasını blok etti. Faaller Cemilevni körmek içün Rusiye quvetçilerini yarıp keçti ve keçiş noqtasına cayav ketti. Anda Qırımğa öyle de kirsetilmegen Mustafa Cemilevnen körüşti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
