Qırım MC ve Aqyar şeeri prokuraturası, işğal etilgen Qırım mahkemelerinde çalışqan sabıq mahkemelerge qarşı qabaatlav aktlarını mahkemege yolladı. Olar devlet hainliginen qabaatlana. Bunı müessiseniñ matbuat hızmeti haber ete.
«Qabaatlanğanlar öz areketlerinen ve qararlarınen yarımadada işğal mahkeme organlarınıñ ve umumen Rusiyeniñ işğalci akimiyetiniñ şekillemesine ve çetel devletniñ temsilcilerine Ukrainağa qarşı faaliyet köstermege yardım ettiler», – dep yazıla bildirmede.
Maddege köre olar on ekinden yigirmi yılğa qadar apis cezasına mahküm etile bile.
Ukraina tahqiqatçılarınıñ versiyasına köre, qadılar Qırım işğal etilgen soñ Kreml nezaretinde olğan Sudaq ve Qarasuvbazar mahkemelerinde çalışqan.
Qabaatlanğanlar qırımtatar milliy areketiniñ 10 faaliniñ memuriy uquq bozma ile qabaatlı olğanı aqqında qararlar çıqardı.
«Söz 2014 senesi mayısnıñ 3-nde yüz bergen vaqialar aqqındadır. O zaman "qanun qoruyıcılar" qırımtatar milliy lideri Mustafa Cemilevge Qırımğa kirüvni yasaq etti. O zaman qırımtatarlar narazılıq bildirip ve işğalge qarşı çıqıp bir qaç yerde yolnı qapattılar - Aqmescit-Aqyar, Herson-Canköy-Keriç, Aqmescit-Kefe-Keriç. Faallerniñ bu areketleri memuriy uquq bozma kibi hasiyetlendi», – dep yazıla bildirmede.
Yedi yıl evelsi, 2014 senesi mayısnıñ 3-nde, biñlernen qırımtatarı liderleri Mustafa Cemilevni qarşılamaq içün işğal etilgen Qırım ve Herson vilâyetiniñ memuriy sıñırına keldi. Bir kün ögüne Rusiye akimiyetiniñ Cemilevniñ Qırımğa kirişini yasaqlamaq qararı aqqında belli oldı.
Zırhlı tehnikası olğan Rusiye quvetçileri Ermeni Bazarnıñ «Turetskiy val» keçiş noqtasında qırımtatarlarnıñ avtokolonnasını blok etti. Faaller Cemilevni körmek içün Rusiye quvetçilerini yarıp keçti ve keçiş noqtasına cayav ketti. Anda Qırımğa öyle de kirsetilmegen Mustafa Cemilevnen körüşti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
