İşğal etilgen Qırımda FSB teşebbüsi ile açılğan «Mustafa Cemilev davası» yarımada şimalinde Rusiye kontrolindeki Ermeni Bazar şeer mahkemesinde baqılacaq.
Bu aqta Cemilevniñ advokatı Nikolay Polozov Facebookta bildirdi.
«Şimdi Qırım prokuraturasından mektüp aldım. Niayet, haber ettiler. Mustafa Cemilevge qarşı dava Ermeni Bazar şeer mahkemesinde uzaqtan baqılacaq. Mahkemeden şimdilik bir haber kelmedi. Davanı qadı İsroilova V.U. baqacaq. İlk diñlevler künü belgilenmesini bekleyim», – dep haber etti Polozov.
Daa evel Polozov Rusiye tahqiqatçısına «Cemilevniñ davası» boyunca ilk diñlevlerni keçirmek muracaatını berdi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
İyünniñ 8-nde berilgen malümatqa köre, Rusiye Tahqiqat komiteti Cemilevniñ davasını mahkemege berdi. Bundan soñ Cemilevniñ advokatı Nikolay Polozov ne oña, ne de müvekkiline haber etilmedi, dep bildirdi.
Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
