Qırımtatar halqınıñ lideri Mustafa Cemilev Ukraina prezidenti Volodımır Zelenskıy ve Rusiye prezidenti Vladimir Putinniñ ola bilecek körüşüvini istenilmegen ve neticesiz olacağını saya. Bunı o «Obozrevatel» neşrine bildirdi.
«Zaten Putin ile er angi eki taraflı körüşüvlerge qarşım. Bu saçmadır. Köz-közge körüşüv tamamınen istenilmegen. Neticesiz olacaq. Prezidentinmizniñ aşalanmasına sebep olacaq. Böyle körüşüvden soñ, reytingi yoq olur, dep tüşünem», – dep qayd etti Cemilev.
Onıñ fikrince, Ukraina ve Rusiye liderleriniñ körüşmesi tek Normandiya dördü çerçivesinde ABD-niñ iştiragi ile mümkün.
«Putin ile ne aqqında laf etmek? Topraq işğal etilgen, vatandaşlarımıznı öldüreler. Körüşüv yalñıñı Normandiya dördü formatında ola bile. Ve ABD-niñ iştiragi ile», – dedi Cemilev.
Aprelniñ 26-nda brifing vaqtında Volodımır Zelenskıy, Rusiye prezidenti Vladimir Putin ile körüşüvi olacağına oşay, dep bildirgen edi. O, Prezident ofisiniñ reberi Andriy Yermakqa bu hususta aytışmağa buyurğan.
Aprelniñ 20-nde Zelenskıy içtimaiy ağlarda videorolik yayınlap, Rusiye prezidenti Vladimir Putinge cenk ketken Donbasnıñ er angi noqtasında körüşmege teklif etti. Vladimir Putin ise cevap olaraq Ukraina devlet başı ile eki taraflı munasebetlerni muzakere etmege azır olğanını bildirdi.
