Ukraina prezidenti Volodımır Zelenskıynıñ taqımı ilhaq etilgen Qırım mevzusından «pek haberdar degil», amma prezidentniñ beyanatları «pek uyğun». Böyle bir fikirni qırımtatar halqınıñ lideri Mustafa Cemilev iyünniñ 19-nda Qırım.Aqiqatqa bildirdi.
«Şimdilik mesleatçı ve yardımcı seviyesinde subetlerimiz ola. Körüşüv azırlanıla: muzakere etilecek mevzular belgilenecek. Mence, bu körüşüv er şeyni añlamaq içün pek kerek. Bundan ğayrı, yañı taqım Qırım ne olğanını ve bu mevzu ne qadar müim olğanını bilmey, dep şübhelenemiz. Bunı prezident saylavlarınıñ birinci ve ekinci basamaqları arasında Zelenskıynıñ taqımı bergen cevaplarğa esaslanıp ayta bilemiz», – dep bildirdi Cemilev.
Cemilevniñ aytqanına köre, diger taraftan Zelenskıynıñ Qırımnen bağlı beyanatları «pek uyğun ve yahşı» ola.
Qırım.Aqiqat Volodımır Zelenskıynıñ matbuat hızmetine muracaat etti, amma haber derc etilgende cevap daa yoq edi.
Volodımır Zelenskıy Bild alman neşirine bergen intervyüsında Rusiye prezidenti Vladimir Putin ile ilk sefer körüşkende «Donbas ve Qırım – Ukrainadır» dep aytacağını bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
