Link açıqlığı

Qırımtatar hаlqınıñ lideri Mustafa Cemilev bugün Varşavada demokratiya ve insan aqlarınıñ qorçalavı oğrunda etken areketleri içün «Birdmelik» mukâfatı ile taqdirlenildi.

Mukâfatnı laureatqa Varşavada Poloniya prezidenti Bronislav Komorovskiy Poloniya sabıq başı Leh Valensa ile taqdim ettiler. Mahsus bu tedbirde iştirak etmek içün Poloniya paytahtına diger memleketlerniñ bir sıra liderleri keldi.

«Leh Valensa ile mukâfatnı Mustafa Cemilevge bermege pek memnünim. İşbu mukâfat yardımı ile öz Avropa birdemligimizni kösteremiz», – dedi Komorovskiy.


Tedbirde, laureattan ğayrı, hayırlav sözleri ile Poloniya çetel işler nazirliginiñ başı Radoslav Sikorskiy, İsveçiya çetel işler nazirliginiñ başı Carl Bildt ve prezident saylavlarında ğalip çıqqan Petro Poroşenko çıqışta bulundı.

Soñkisi Qırım «tezden serbest olacağını» vade etti.

«Birdemlik» mukâfatınıñ para miqdarı – million avro. Cemilevniñ sözlerine köre, bu paranı o «Qırım inkişafı fondı»na masraf etecek eken.

«Bir qısmını, aytqan edim, Nebesnaya sotnâ qaramanlarınıñ ve antiterroristik ameliyatınıñ qorantalarına 100 biñ avro bermege ister edim»,– dedi o.

Mustafa Cemilev bu mukâfatnı qırımtatar halqına ve Ukrainağa kösterilgen maneviy destek olaraq tanıy.
XS
SM
MD
LG