«Şimdi Avropa memleketleri, birinciden Frenkistan ve Almaniya, ABD yardım etmese, biz bunı öz boynumızğa alacaqmız dep bildireler. Eger olar kerçekten de bunı yapıp olsalar, biz işğalden azat etüvniñ arbiy çezüv variantına qayta bilemiz», – dedi Cemilev.
Böylece qırımtatar halqınıñ lideri Ukrayina prezidenti Volodımır Zelenskıynıñ Kyivniñ şimdi Qırımnı cenknen azat etmek içün küçü yoq degen laflarını izaatladı.
«Men prezidentni pek yahşı añlayım, çünki o, Qırımnı küçnen azat etmek içün 40 biñ askerimizni qurban etmek kerek olacağını ayttı. Odada oturıp aytmaq qolay: «Yoq, feda eteyik!» Aytmaq qolay, amma insanlarnıñ ömürleri aqqında aytıla», – dep qayd etti Cemilev.
Onıñ fikirince, Zelenskıynıñ pozitsiyasına bazı ğarbiy memleketlerniñ, birinciden yañı saylanğan ABD prezidenti Donald Trumpnıñ pozitsiyası büyük tesir etkendir.
«Ve Zelenskıy, mence, añlay, Ğarp ve ABD tarafından yardım kelmegen şaraitler olsa, bizge [bunı yapmaq – QA] arbiy vastalarnen pek qıyın olacaq», – dep qoştı Cemilev.
Noyabrniñ soñunda Fox News telekanalına bergen intervyüsında Zelenskıy Qırımnı işğalden azat etmek içün Ukrayina on biñlernen adamnı coyıp olamaycağını – onı diplomatik vastalarnen qaytarmaq mümkün olğanını ayttı.
Zelenskıynıñ aytqanına köre, Ukrayina uquq ceetinden işğal etilgen iç bir topraqnı Rusiyeniñ territoriyası olaraq tanıp olamay.
«Laf 2014 senesinden başlap büyük ücümden evel Putin tarafından işğal etilgen topraqlar aqqında kete. Qanun ceetinden bunı tanımaymız. Biz bunı qabul etmeymiz. Diger taraftan, elimizde silânen Putinni 1991 senesi çizgisine qaytarmaq içün küçümiz olmağanını añlaymız», – dedi o vaqıt Zelenskıy.
Rusiye 2014 senesi Qırımnı ilhaq etti ve Donbasnıñ silâlı gruppalarına yardım etti. 2022 senesi Moskva Ukrayinağa qarşı büyük ücüm başlattı, bunı Kyiv ve Ğarp, BM memleketleriniñ çoqusı kibi, sebepsiz istilâ olaraq tarif ettiler. Rusiye akimiyeti cenkniñ esas maqsatları arasında Ukrayinanıñ «denatsifikatsiyası» ve «askeriysizleştirilüvi» kerekligini qayd etti.
Cenk vaqtında Rusiye Ukrayina topraqlarınıñ bir qısmını işğal etti. Cenkte eki taraftan da on biñlernen asker ve biñlernen barışıqsever Ukrayina sakini elâk oldılar. Bu cenk Ekinci cian cenkinden soñ Avropada eñ büyük cenk olaraq tasnif etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
