Qırımtatar halqınıñ lideri, Ukraina halq deputatı Mustafa Cemilev prezidentniñ qırımtatarlarnıñ işlerinden vekâletlisi tayin etilsin, dep israr ete. Bu aqta o, oktâbrniñ 5-nde Kyivdeki brifingde ayttı.
«Qırımtatar Milliy Meclisiniñ Prezident ofisi ile işbirligi pek müim… Beşinci prezident vaqtında qırımtatarlarnıñ işlerinden vekâletlisi bar edi, bu vazifeni ğayrıdan tiklemeli, şimdi o yoq, ya da toqtatıldı. Bu meseleden bir haberimiz yoq. Bir taraftan, prezident bizden namzet bekley, dep ayta, biz namzetimizni bir yıl evelsi berdik, amma cevap yoq», – dedi Mustafa Cemilev.
Ukrainanıñ beşinci prezidenti Petro Poroşenko Prezidentniñ qırımtatar halqınıñ işlerinden vekâletlisi vazifesini 2014 senesi avgust ayında tesis etti. Bu vazifege Mustafa Cemilev tayin etilgen edi. 2019 senesi mayısnıñ 18-nde Poroşenko Cemilevniñ bu vazifeden ayırılmasına dair buyruqnı imzaladı.
Ukraina prezidenti Volodımır Zelenskıy 2019 senesi oktâbr ayında dedi ki, qırımtatarlardan qırımtatar halqınıñ işlerinden vekâletlisi vazifesine namzet bekley.
Cemilev, Qırımtatar Milliy Meclisiniñ reisi Refat Çubarovnıñ namzetini daa 2019 senesi avgust ayında teklif etti, dep bildirdi.
Qırım.Aqiqat Ukraina prezidentiniñ ofisine muracaat etip, Mustafa Cemilevniñ aytqanlarını izaatlamağa rica etti.
