Keriç boğazında Rusiyeniñ Ukraina askerlerini esir alması barışıq içün telüke ve «sanktsiyalarnı arttırmaq içün ciddiy bir sebep» ola.
Böyle fikirni qırımtatar halqınıñ lideri, Ukraina halq deputatı Mustafa Cemilev noyabrniñ 26-nda Qırım.Aqiqatqa bildirdi.
«Pek telükeli vaziyet. Silâlı quvetlerimiz qarşılıq köstermek içün yeterli qadar küçlü degildir. Amma menim fikirimce, istilâcığa qarşı sanktsiyalarnı quvetleştirmek içün ciddiy bir sebep bar. Olar korsanlıq yapmağa başladılar. Gemilerimizni zapt etip, halqara deñiz uquqına zıt bir şekilde öz limanlarına alıp keteler. Ğarp buña daa ne qadar dayanacaq? Umumiy barışıq içün bir telüke bar», – dep tüşüne Cemilev.
Türkiye noyabrniñ 26-nda Keriç boğazınıñ blokunı toqtatıp, Qara deñiz regionında vaziyetniñ kerginleşmesine ve istiqrarnıñ bozulmasına yol bermemege çağırdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı.
Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Noyabrniñ 26-nda gece Ukraina milliy telükesizlik ve mudafaa şurasınıñ toplaşuvında cenk vaziyetini kirsetmek içün azırlıq körmege qarar alındı.
Tünevin Rusiye Ukraina arbiy gemileri Keriç boğazından keçmesin dep, Keriç boğazını vatandaş gemileriniñ keçmesi içün de qapattı. Ukraina Tış işler nazirligi noyabrniñ 25-nde olğan adiseden soñ Rusiyeniñ Qara ve Azaq deñizlerinde yapqanlarını tenqit etti.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
