Qırımtatar halqınıñ lideri Mustafa Cemilev, Ukrayina ile Rusiye arasında ola bilgen añlaşmada mıtlaqa Qırım işğal etilgen topraq olğanı qayd etilmek kerekligini bildirdi. Bunı, o, İstanbulda Ukrayina delegatsiyasınıñ brifingi vaqtında ayttı.
"Ukrayinanıñ muvaqqat işğal etilgen topraqlarınıñ işğalden azat etilüv kontseptsiyası küç qullanmasını közde tutmay. Rusiye bütün bular işğal etilgen topraqlar olğanını ve status aqqında aytışuvlar ketkenini tanığanda Rusiye bu işğal etilgen topraq olğanını qabul etecek. İşğal etilgen topraqlar aqqında 1949 senesi Jeneva şartnamesine köre, işğal etilgen Qırımda Ukrayina qanunları işlemek kerekler. Bu bizim içün pek müimdir. Mıtlaqa, bu, işğal etilgen topraqlar olğanı qayd etilmeli", - dedi Cemilev.
Öz nevbetinde, Ukrayina delegatsiyasınıñ başı David Arahamiya İstanbulda aytışuvlar vaqtında "Ukrayinanıñ noqta-i nazarı deñişmegenini" bildirdi.
"Biz Ukrayinanıñ sıñırlarını 1991 senesi itibarınen tanıymız. İç bir uzlaşuv yoq. Biz tek böyle ifadelevni imzalaycaqmız. Rusiyeniñ öz versiyası ola bilir, amma Ukrayinanıñ noqta-i nazarı aydındır ve muzakere etilmez", - dedi o.
Aynı zamanda, o, Rusiye ile ola bilgen añlaşma halqara ortaqlarınıñ kefaletleri "çatışma mıntaqası" olmağan topraqlarğa ait olacağını qayd etti.
Ukrayina delegatsiyası İstanbulda keçken Rusiye ile aytışuvlarda, Rusiyege yaqın 15 yıl devamında Kıyiv ve Moskvanıñ işğal etilgen Qırımğa dair noqta-i nazarını qayd etecek añlaşmanı teklif etti.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
