Rusiye aytışuvlar içün yollarnı qapattı ve şimdi Qırımnı azat etmek içün yalıñız arbiy yol bar, dep bildirdi Ukrayina millet vekili, qırımtatar halqınıñ milliy lideri Mustafa Cemilev.
"Aytışmalar içün bütün yollarnı özleri qapattılar. Şimdi ise arbiy yoldan başqa bir yol yoq. Qırımdan semetdeşlerim telefon etip, nasılsıñ, istiqballer ne, dep sorağanda, men, büyük ihtimalnen yarımada arbiy yolnen azat etilcegini aytam. Biz arbiy bazalarğa qarşı ateş açacaqmız deyim. Elbette men şuurlı insanlarnen laf etem. Olar maña deyler: mındasını ceennemge çevirsañiz bile biz er şeyge azırmız, tek keliñiz. Qırımtatarlarnıñ bu meselege munasebeti böyledir", - dedi Cemilev.
Rusiye Ukrayinağa qarşı büyük cenkni başlağan soñ aytışmalar vaqtında ukrayin tarafı tecavuzcı 2022 senesi fevralniñ 24-nde olğan sıñırğa çekilmeli, Donbas ve Qırım meselesi ise aytışmalar yolu ile çezilmelidir, dep bildire edi.
"Amma Putinniñ spikeri Peskov Qırım meselesi muzakere etilmeycegini birden bildirgen edi", - dep añlattı o.
Ukrayina Mudafaa nazirligi Baş istihbarat idaresiniñ reberi Kırılo Budanov Ukrayina Silâlı quvetleriniñ qarşı ücümine azırlıq «planğa köre kete», amma yerine ketirüv planlarını aydınlatmaycaq, dep bildirgen edi.
Qırımnıñ Rusiye yolbaşçısı Sergey Aksönov Ukrayina istihkam ve mudafaa sayesinde yarımadanı işğalden qurtarıp olamaycaq, dep aytqan edi.
Mayısnıñ başında Baş istihbarat idaresiniñ vekili Andriy Yusov Qırımda Rusiye memuriyetleriniñ temsilcileri Rusiye işğal etken yarımadanı terk ete, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
