Rusiye arbiyleri tarafından işğal etilgen Ukrayina topraqlarında, hususan Herson velâyetinde ve Melitopolde zapt etilgen ukrayinalı faallerni işgal etilgen Qırımnıñ SİZO-larına alıp ketireler. Bunı Qırımtatar halqınıñ lideri Mustafa Cemilev ayttı.
"Tahqiqat tevqifhanelerniñ boşatılması, bir çoq mabüslerniñ etap etilmesi ve şimdi anda işğal etilgen topraqlardan mabüsler yerleştirilgenini haber eteler. Hersondan, Melitopolden anda ketireler", - dedi Cemilev.
Qayd etkenine köre, yerli mabüslerniñ zapt etilgen faallerniñ yanına qoymaylar. Bar olğan malümatqa köre, tutulğan ukrayinlerni iskencelerge oğratalar.
Bu malümatnı tasdıqlağan diger menbalar yoq.
Mart ayında Rusiye tarafından işğal etilgen Qırımda mahküm etilgen Qırım.Aqiqat frilanseri Vladislav Yesipenko Aqmescitniñ SİZO-larında Ukrayina qıtasınıñ Rusiye ordusı tarafından işğal etilgen topraqlarından olğan mabüsler içün yer boşatqanların bildirgen edi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
