Qırımtatar halqınıñ lideri Mustafa Cemilev Qırımğa köçip kelgen Rusiye vatandaşlarını Keriç köprü çalışqanı qadar yarımadanı terk etmege çağırdı. Muvafıq muracaat siyasetçiniñ Facebook saifesinde derc etildi.
''Bu sene işğalniñ soñki yılı olacaq, dep tüşünmege bütün sebepler bar. Şunıñ içün arbiy olmağan, vatandaş şahıslarğa arbiy obyektlerden uzaq turmaq, Qırımğa qanunsız kirgen Rusiye vatandaşlarına ise, Keriç köprü çalışqanına qadar, yarımadanı terk etmege tevsiye etile", - dep qayd etti o.
Cemilevniñ aytqanına köre, Ukrayina Qırımnı barışıq yolnen azat etmek içün çoq ğayret kösterdi. Amma "arbiy yoldan ğayrı çare qalmadı".
Qırımtatar halqınıñ lideri, Ukrayina cenk areketleri vaqtında vatandaşlar zarar körmesin dep, elinden kelgenini yapacağına işandırdı. "Amma Ukrayina Rusiye ordusınıñ insaniyetsiz strategiyası, tınç vatandaşlar tarafından qorçalanmaq strategiyası içün mesül degil", - dep qayd etti o.
''Halqara uquq ve adalet ertemi keçmi ğalebe qazanacaq. Azat Qırımda körüşkence", - dedi Cemilev.
Daa evel Ukrayina Mudafaa nazirliginiñ Baş istihbarat idaresiniñ yolbaşçısı Kırılo Budanov Qırım.Aqiqatqa bergen intervyüsında Qırımnıñ qaytarıluvı qarışıq yolnen yapılacağını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
