İşğal etilgen Qırımda yarımada kelecegini ve onıñ işğalden qurtarılacağını tüşüngen vatanperverler yete, dep ayta qırımtatarlarnıñ lideri, Ukraina Yuqarı Radasınıñ deputatı Mustafa Cemilev.
Bu fikirni o, fevralniñ 26-nda Qırımnıñ Rusiye işğaline qarşı tirenüv kününe bağışlanğan Kyivdeki «Age of Crimea» forumında kiriş sözünde bildirdi, dep haber ete Qırım.Aqiqat mühbiri.
«Men qorqunı işğalcilerden nefretke çevirmege ve işğalge qarşı barışıq ve zorbalıqsız tirenüv esaslarına çağıram. Şarqta ikmetli bir ata sözü bar: «Terisi bir kapik olmağan terisini daa çoq tüşüne». Eminim ki, Qırımda öz terisini degil, yarımadanıñ kelecegini, balalarınıñ kelecegini tüşüngen vatanperverler yete. Qırımnıñ sadıq vatanperverleri yaşasın, yaşasın Ukraina!», – dedi Cemilev.
Onıñ aytqanına köre, 2014 senesinden soñ işğal etilgen topraqta bütün demokratik serbestlikler yoq etildi ve yarımadada «kommunist rejiminiñ eñ beter yıllarını añdırğan rejim tiklendi».
Qırımtatarlarnıñ lideri, Yuqarı Rada deputatı Mustafa Cemilev ve Ukraina prezidenti Volodımır Zelenskıy Qırımnıñ Rusiye işğaliniñ 6-ncı yılına bağışlanğan Kyivdeki «Age of Crimea» («Qırım vaqtı») forumında çıqışta bulundılar.
Age of Crimea forumı çerçivesinde Qırımda insan aqları bozuvları ve tamır halqınıñ aqlarına riayet etüv, yarımadadaki Rusiye propagandası, em de Qara deñiz regionınıñ telükesizlik meselelerini muzakere etmege planlaştırıla.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
