Link açıqlığı

Qırımtаtar halqı lideri, Ukraina halq deputatı Mustafa Cemilevniñ fikirince, Qırım Rusiyeniñ bir parçası olğanını beyan etken Anayasanı muzakere etmek mantıqsızdır.

Bunı o Qırım.Aqiqat saytına bildirdi.

«Qırım Rusiyege ait olğanını ifadelegen er angi Anayasa bizge kelişmey», - dedi o. «Bu madde alıp taşlansa, lafnı devam etmege mümkün», – ilâve etti Cemilev.

Bunen beraber, separatitlerniñ ayın-oyunlarını qayd etti. Bundan evel «akimiyet» qırımtatar halqı aqlarınıñ tiklenüvi aqqında qarar alğan ediler. Vesiqağa binaen, qırımtatarlar parlament ve diger icra organlarında 20 fayızlıq kvota ile teminlenmek, yerli şuralarda vazifelenmek kerek ediler, amma birazdan soñra, vesiqada añılğan vadeler aqqında «unutqan» anayasa dünya yüzü kördi.

Aprelniñ 11-de tanılmağan Qırım Cumhuriyeti Devlet Şurasınıñ nevbetten tış umumiy toplaşuvında «Qırım Cumhuriyetiniñ Anayasası» qabul etildi.

Bundan evel Meclis separatistlerge «Qırım Cumhuriyetiniñ Anayasasını» cemaatçılıqnen beraber muzakere etmek ve qırımtatar halqınıñ menfaatları ve aq-uquqlarını köz ögüne alaraq deñiştirmege teklif etip, qabul etmege çağırdı. Meclis beyanatına binaen, qırımtatar halqı tamır halq olaraq tanılmalı, «qırımtatarlar cumhuriyetniñ içtimaiy-siyasiy ayatında semereli iştirak etüvini kefil etilmeli» ve Qurultay, Qırımtatar Milliy Meclisi resmiy şekilde tanılmalı.
XS
SM
MD
LG