Qırımtatar halqınıñ lideri Mustafa Cemilev «Qırım işğali uzun sürmeycegini» tüşünip, yarımadağa sağ qaytmağa niyetlene. Bunı o, «Ukrinform» haber agentligine bergen intervyüsında bildirdi.
«Vaziyet (Qırımdaki – QA) kerginleşe ve kerginleşecek. İşğalci rejimden bir de bir liberalleşüv beklenmemeli. Şimdi bizni eñ çoq balalarğa yönelgen zombiyleştirüv teşviqatı raatsızlay. Onıñ büyük tesiri bar. Sovetler Birligi vaqtında zombiyleştirüv 70 yıl devam etti, amma biz teslim olmadıq ve ilk fursatta ondan temizlendik. Sovetler vaqtında insanlarnıñ dünyabaqışını deñiştirmege tırışqan ediler, bunı şimdi de yapalar. Lâkin işğal o qadar uzun sürecegini tüşünmeyim. Qırımğa sağ qaytmağa niyetim bar», – dep qayd etti Cemilev.
Cemilev, Qırımnı işğalden qurtarmaq içün Rusiye dağılmalı, dep ayttı.
Ukraina prezidenti Petro Poroşenko yañı yıl munasebetinen ukrain halqına muracaat etip, qırımlılarğa «yol ne qadar uzun olsa da, sizge barışıqnen qaytacaqmız», dep ayttı.
2014 senesi aprelniñ 22-nde Cemilev, Qırımnıñ Ukraina ile memuriy sıñırından keçkende «Rusiyege kiriş yasağına dair bir vesiqa» oqulğanını bildirdi. Vesiqada ne müür, ne imza bar edi, faqat çetel vatandaşınıñ Rusiyege beş yılğa – 2019 senesi aprelniñ 19-na qadar kirmege yasaq etilgeni aqqında aytılğan edi. Rusiyeniñ Federal migratsion hızmeti bu adisenen iç bir alâqası olmağanını bildirdi, lâkin mayısnıñ başında Cemilev Qırımğa eki kere alınmadı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
