Rusiye prezidenti Vladimir Putin Ukraina prezidenti Petro Poroşenkonıñ reytingini saylavlardan evel kötermemek içün Qırım yalısında zapt etilgen ukrainalı askerlerniñ azat etilüvi ya da almaştırıluvını muzakere etmeycek. Bu fikirni qırımtatar halqınıñ lideri, Ukraina halq deputatı Mustafa Cemilev Qırım.Aqiqatqa bildirdi.
«Türkiye Tış işler nazirinen laf etken soñ añladım ki, Putin zapt etilgen deñiz askerleriniñ azat etilüvi ya da almaştırıluvı aqqında Ukraina prezidentiniñ saylavlarından evel laf etmeycek. Olarnıñ azat etilüvi Poroşenkonıñ reytingini köterir, dep tüşünedir, Putin ondan nefret ete ve qorqa», – dep tarif etti Cemilev Odesada ukrainalı askerlerniñ soy-soplarınen körüşip.
Onıñ bildirgenine köre, Ukraina «ukrainalı askerlerniñ azat etilüvi ve tutuluv şaraitleriniñ yımşatıluvı içün» er şey yapa.
Qırımtatar Milliy Meclisiniñ reis muavini Ahtem Çiygoz FSB tarafından zapt etilgen askerlerniñ soy-soplarınen körüşip, olarnıñ azat etilüvi içün küreş, hususan halqara meydançıqlarda devam etecek, dep işandırdı.
Moskvanıñ Lefortovo mahkemesi yanvarniñ 15-nde Rusiye Federal telükesizlik hızmetiniñ Qırım yalısında zapt etilgen ukrainalı askerlerni aprelniñ 26-na qadar apiste qaldırmaq muracaatını baqacaq.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
