Qırımtatar halqınıñ lideri, Ukraina halq deputatı Mustafa Cemilev Ukraina prezidentiniñ qırımtatar halqı işlerinden vekâletlisi vazifesinden boşatıldı.
2019 senesi mayısnıñ 18-nde Ukraina prezidenti olğan Petro Poroşenko tarafından imzalanğan ferman Ukraina prezidenti memuriyetiniñ saytında derc etildi.
«Cemilev Mustafanı Ukraina prezidentiniñ qırımtatar halqı işlerinden vekâletlisi vazifelerini yerine ketirüvden boşatmaq», – dep aytıla vesiqada.
Cemilevniñ QHA neşirine bildirgenine köre, eñ yaqın vaqıtta Qırımtatar Milliy Meclisinde bu vazifege tayin etile bilecek namzet muzakere etilip, Ukraina prezidenti Volodımır Zelenskıyge tevsiye etilecek.
«Prezident yanında qırımtatar halqı işlerinden vekâletlisi olmaq kerek, dep tüşünem, amma illâ men olmaycam. Meclis kimni tevsiye etecegini qarar alacaq. Yaş birisiniñ tayin etilmesini ister edim, çünki bizler endi mamont kibi qartmız», – dedi Cemilev.
2014 senesi Rusiye Qırımnı ilhaq etken soñ Ukraina prezidenti yanında qırımtatar halqı işlerinden vekâletlisiniñ ofisi qurulğan edi, onıñ yolbaşçısı Mustafa Cemilev oldı.
