Link açıqlığı

Qırımtatar milliy Meclisiniñ faaliyeti yarımadada yasaq olsa, onıñ yolbaşçılarını yaqalasalar bile, о, episi bir öz işine devam etecek

Bunı Kiyevde matbuat-konferentsiya devamında qırımtatar halqınıñ milliy yetekçisi Mustafa Cemilev bildirdi. Onı keçken raatlıq künleri Qırım toprağına kirsetmediler.

«Öz başına ilân etilgen Qırım akimiyeti qırımtatar milliy Meclis binasını qapata bile, liderlerni yaqalay bile, amma o vaqıt başqaları saylanılır… Eger de Meclis ofisini qapatsalar, yerli meclisler öz faaliyetine gizli, ya da yarı gizli sürette devam etecekler», – dedi Cemilev.

O, Rusiye akimiyeti qırımtatarlarnıñ bölünüvi ve olarnıñ öz tarafına çekkeni boyunca faal işni alıp barğanını da qayd etti.

«Faqat, akimiyet temsilcileri bunı etip olamaylar, neticede olar öz maqsadını amelge keçirmek içün Tataristandan kendi insanlarını ketireler. Umumen alğanda, soñki yılları, hususan 2010 senesinden başlap, böyle «bölünüv» siyaseti Yanukoviçniñ rejimi tarafından da keçirile edi», – dedi Cemilev.

Öz yetekçisini yarımadağa kirsetmege talap etken qırımtatarlarnıñ narazılıq numayışından soñ, «Qırım Cumhuriyetiniñ prokurorı» Natalya Poklonskaya qırımtatar milliy Meclis reisini «ekstremizm faaliyetiniñ musaadesizligi» aqqında tenbiyeledi ve aks alda qırımtatarlarnıñ temsiliy organınıñ dağıtıluvı ile qorquzdı.
XS
SM
MD
LG