Link açıqlığı

Saatnıñ esas haberi

Cemilev Lübnan ziyareti vaqtında Rusiyege qarşı sanktsiyalarnıñ quvetleştirilmesi kerekligini muzakere etti


Mustafa Cemilev
Mustafa Cemilev

Ukraina prezidentiniñ qırımtatar halqınıñ işlerinden vekâletlisi, qırımtatar halqınıñ lideri Mustafa Cemilev Lübnan Cumhuriyetini resmiy şekilde ziyaret etti. Anda o, memleket prezidenti Mişel Aun ile körüşip, Rusiyege qarşı sanktsiyalarnıñ quvetleştirilüvini muzakere etti. Bu aqta vekâletliniñ resmiy Facebook saifesinde aytıla.

«Qırımtatar halqınıñ problemlerine büyük diqqat ayırıldı. Lübnan Cumhuriyetiniñ prezidentine Rusiye işğal etken Qırımda yaşağan Ukraina vatandaşları, hususan qırımtatarlarnıñ aq ve serbestliginiñ bozuluvı aqqında malümat berildi ve istilâcı memleketke qarşı sanktsiyalarnıñ devam etmesi ve quvetleştirilmesi kerek, dep qayd etildi», – dep aytıla haberde.

Cemilev Ukrainanıñ Lübnan elçihanesini de ziyaret etti. Anda elçi İgor Ostaş da bar edi, qırımtatar bayrağı köterildi.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG