Ukraina prezidentiniñ qırımtatar halqı işlerinden vekâletlisi Mustafa Cemilev Qırımnı işğalden qurtarğan soñ ukrainler ve qırımtatarlar «rusiyelilerniñ yapqanlarını zararsız alğa ketirmek içün» çoq şey yapmağa mecbur olacaq, dedi. Bu aqta o, «Ukrain cemiyeti ve Qırım – kelecekke baquv» açıq munaqaşası vaqtında ayttı.
«Köy hocalığı, hususan, Qırımnıñ şimaliy qısmında aman-aman yoq etildi. Dnipro suvı kelmegeni içün yüzlernen artezian quyusını qazıp, tarlalarnı mineral suvnen suvarmağa tırışqanlar. Neticede yerastı suvları tahminen 17 metrge tüşti. Topraq tuzlana, köy hocalığı içün ise kelişmey», – dedi Cemilev.
Onıñ qayd etkenine köre, «Qırımnı qurtarğan soñ onı ğayrıdan tiklemek içün çoq küç ve sermiya kerek olacaq».
Cemilev Ukrainanıñ BM daimiy vekili Volodımır Yelçenkonıñ malümatına esaslanpı, Qırımğa işğalden soñ 100 biñden ziyade Rusiye vatandaşı ketirildi, dep qayd etti. Bu insanlarnı Ukraina sıñırından qanunsız keçkenleri içün ceza bekley, dedi.
«Ukrain cemiyeti ve Qırım – kelecekke baquv» açıq munaqaşası Qırım.Aqiqat qurulğanınıñ beş yılına bağışlana.
Qırım.Aqiqat – Azatlıq Radiosı ukrain bürosınıñ Qırım leyhasıdır – 2014 senesi mart ayında, işğalden soñ ve Rusiyeniñ Qırım ilhaqı vaqtında, çalışıp başladı.
Azatlıq Radiosınıñ Qırım taqımı üç tilde haber saytını yapa: rusça, ukraince ve qırımtatarca, aftada eki kere «24» haber telekanalında ve «Nastoyaşçeye vremâ» halqara telekanalında «Qırım.Aqiqat» televizion programmalarını azırlay.
2015 senesi sentâbr ayında Qırım taqımı Ukraina radiosınen beraber Qırım.Aqiqat Radiosını açtı. O, Qırımnıñ büyük qısmında, Ukrainanıñ cenübi-şarqında ve Rusiyeniñ Şimaliy Kavkaznıñ dağ rayonlarında yayınlana, 2017 senesi sentâbr ayından başlap ise Qırım.Aqiqat Radiosınıñ kanalı gece-kündüz 105,9 FM dalğasında çalışa.
