Qırımtatarlarnıñ lideri, Ukraina halq deputatı Mustafa Cemilev, Kreml nezaretindeki Qırım akimiyeti onı «Qırımdan nefret etkenler» sırasına degil de, «işğalcilerden nefret etkenler sırasına» kirsetse edi, daa doğru olur edi, dey. Böyle bir fikirni Cemilev sentâbrniñ 26-nda Qırım.Aqiqatqa aydınlattı. O, Qırım akimiyetiniñ onı böyle bir cedvelge kirsetmek qararını izaatladı.
«İşğalcilerden nefret etkenler» – kelişir edi, amma «Qırımdan nefret etkenler»… Qırım oğrunda yıllarnen küreştim, yıllarnen apiste yattım. İşğalcilerden nefret etem – doğru. Başqaları (Refat Çubarov, İlmi Umerov, Ahtem Çiygoz ve Lenur İslâmov – QA) aqqında da aynısını ayta bilem. Olar ana yurtunıñ vatanperverleri ola ve bu marazlarnen (Qırımnı işğal etkenlernen – QA) küreşecekler», – dep ayttı Cemilev.
Sentâbrniñ 25-nde belli olğanı kibi, Kreml nezaretindeki «Qırımnıñ cemaat palatası» Qırımtatar Milliy Meclisiniñ reberleri ve «Qırımnıñ vatandaş qamaçavı» aktsiyasınıñ teşebbüsçileriniñ adlarını Rusiyeniñ yarımada işğalini tanımağan ve Rusiyege qoltutqanlar tarafından «qırımlılarnıñ aqlarını bozğanında» qabaatlağan Ukraina ve Rusiye erbaplarınıñ cedveline kirsetti.
«Qırımnıñ cemaat palatasınıñ» Rusiye yolbaşçısı Grigoriy İoffe cedvelge qırımtatarlarnıñ lideri, Ukraina halq deputatı Mustafa Cemilev, Qırımtatar Milliy Meclisiniñ reisi Refat Çubarov, reis muavinleri İlmi Ümerov ve Ahtem Çiygoz, ATR telekanalınıñ baş müdiri Lenur İslâmov kirsetilgenini aydınlattı.
Kreml nezaretindeki «Qırım cemaat palatası», Rusiyeniñ Qırım işğalini tanımağan Rusiye ve Ukraina erbaplarınıñ adlarını toplay, dep bildirgen edi.
Vesiqada Ukraina Yuqarı Radasınıñ sabıq deputatı Andrey Sençenko, Qırım Muhtar Cumhuriyeti ükümetiniñ sabıq reisi, Ukraina Yuqarı Radasınıñ deputatı Sergey Kunitsın, Ukraina insan aqları vekâletlisi Lüdmila Denisova, jurnalist Pavel Kazarin, Vernadskiy Tavriya Milliy universitetiniñ rektorı Vladimir Kazarin, Ukraina Arbiy-deñiz quvetleriniñ sabıq komandanı Sergey Gayduk, Qırımnıñ sabıq iqtisadiyatçısı Andrey Klimenko, jurnalist Aleksandr Yankovskiy, jurnalist tedqiqatları merkeziniñ muarriri Valentina Samar qayd etile. Cedvelge QMC prokuraturasınıñ yolbaşçısı Günduz Mamedov, Qırım ve Aqyardaki Ukraina telükesizlik hızmeti baş idaresiniñ yolbaşçısı Aleksandr Şmitko, QMC ve Aqyardaki Milliy politsiya baş idaresiniñ yolbaşçısı Anatoliy Bahçivanji ve Ukraina prezidentiniñ Qırımdaki daimiy vekili Boris Babin, em de bir sıra Rusiye erbabı, şu cümleden yırcı Andrey Makareviç ve oyuncı Liya Ahecakova da kirsetildi.
2015 senesi sentâbrniñ 20-nde qırımtatar liderleriniñ teşebbüsi ile Qırımğa aşayt mallarını taşığan yük maşinaları blok etilmege başlağan edi. Teşkilâtçılarnıñ aytqanına köre, bu qamaçav planlaştırılğan areketlerniñ birinci basamağı oldı. 2015 senesi noyabr ayında onıñ ekinci – energetik basamağı başladı. 2016 senesi yanvar ayınıñ ortalarında Qırım qamaçavı aktsiyası formatını deñiştirdi, dep bildire teşkilâtçılar.
