Qırımtatar halqınıñ lideri, Ukraina halq deputatı Mustafa Cemilev Türkiye prezidenti Recep Tayyip Erdoğannıñ Rusiye tarafına «azat etilecek» ukrainalı siyasiy mabüslerniñ cedvelini bergeniniñ tafsilâtlarını aydınlattı.
Mustafa Cemilev Qırım.Aqiqatqa bergen izaatlarında qayd etti ki, cedvelge işğal etilgen Qırımda Rusiye uquq qoruyıcıları tarafından tutulğan Ukraina vatandaşları kirseldi. Cemilevniñ aytqanına köre, Erdoğan cedvelni Rusiye prezidenti Vladimir Putinge yaqın olğan insanğa berdi.
«Laf Qırımda işğalci akimiyet tarafından apiske alınğan siyasiy mabüslerimiz aqqında kete. Tam olaraq hatırlamayım, 70 ya da 63 insan bar, millet mensüpligine baqmadan, er kes qayd etildi… Bu meselede yapqanlarını Erdoğandan soracaq edik. Amma o, strategik işbirligi toplaşuvında suallerimizden evel cedvelni bergenini ayttı. Soñra ayrıca körüşip soradım: «Tış işler nazirligine berdiñizmi?». O, dedi ki: «Yoq, Putinniñ eñ yaqın insanı bar… 24 saat içinde bütün aytqanlarımıznı Putinge yetkize», – dep tarif etti Mustafa Cemilev Qırım.Aqiqatqa.
Onıñ bildirgenine köre, Erdoğan, Türkiye tarafı Rusiyeden cevap daa almadı, dep ayttı.
Mustafa Cemilevniñ qayd etkenine köre, Qırımtatar Milliy Meclisi Qırımda «apiske alınğanlarnı» cedvelge ala. Bu mevzuda «KrımSOS» cemaat birleşmesi yardım ete.
Bundan evel Türkiye prezidenti Recep Tayyip Erdoğan, Rusiye tarafına azat etilecek ukrainalı siyasiy mabüslerniñ cedvelini bergenini ve bu meseleniñ muvafaqiyetli çezilecegini beklegenini bildirgen edi.
Türkiye prezidenti Recep Tayyip Erdoğan qırımtatarlarnıñ milliy lideri Mustafa Cemilevden «Putin ile laf etilecek» Kremlniñ ukrainalı esirleriniñ cedvelini bermege rica etken edi.
Keçken sene oktâbr ayında Rusiye işğal etken Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Ümerov Türkiyege teslim etilgen edi. Resmiy olmağan malümatqa köre, Çiygoz ve Ümerovnıñ teslim etilmesi aqqında Türkiye prezidenti Recep Tayyip Erdoğannıñ Rusiye prezidenti Vladimir Putin ile keçirgen körüşüvinde añlaşılğan edi.
Aq qorçalayıcılarnıñ malümatına köre, 60-tan ziyade Ukraina vatandaşı Rusiye ve işğal altındaki Qırımda siyasiy sebeplerden azatlıqtan marum etilgen edi. Ukraina Tış işler nazirligi Rusiyege 300 kere narazılıq bildirip, anda tutulğan ukrainalılarnıñ azat etilmesini talap etti.
