Türkiye prezidenti Recep Tayyip Erdoğan qırımtatar halqınıñ lideri Mustafa Cemilevnen laf etip, «Qırım platformasına» islâm dünyasından qoşma iştirakçi memleketlerni celp etmege yardım etecek, dep vade etti. Bu aqta Cemilev Qırım.Aqiqat Radiosınıñ yayınında ayttı.
«Erdoğannen körüşip, «Qırım platformasınen» bağlı tam fikri içün teşekkürler bildirdim, amma bu yeterli olmağanını ayttım: Türkiye üçünci dünya memleketlerinde, islâm memleketlerinde, tesirini qullanmalı, olar da «Qırım platformasına» qoşulsın… (Avgustnıñ soñunda Kyivde keçirilmesi planlaştırılğan – QA) sammitten evel islâm memleketlerine bir qaç ziyaretimiz olacaq, ve Erdoğan bu meselede qol tutacağını vade etti», – dep qayd etti qırımtatarlarnıñ lideri.
Mustafa Cemilev, Türkiyeniñ özüniñ «Qırım platformasında» iştirak etmesi müim ola, dep qayd etti.
«Türkiye Ukrainadan eki qat büyük ve umumiy milliy mahsulatı ondan beş qat büyüktir. Türkiye ordusı Avropada eñ büyüktir – tahminen 400 biñ insan. Em de o, Qara deñizniñ lideri ola, dep aytmaq mümkün», – dep ayttı Cemilev.
Türkiye akimiyeti, Mustafa Cemilevniñ beyanatını açıq şekilde izaatlamadı.
Türkiye prezidenti Recep Tayyip Erdoğannıñ aprelniñ 10-nda bildirgenine köre, İstanbulda Ukraina prezidenti Volodımır Zelenskıy ile keçirgen muzakerelerde Ankaranıñ Qırım ilhaqını tanımamaq qararını tasdıqladı ve Ukraina akimiyetiniñ yarımadanı işğalden qurtaruv teşebbüsi olğan «Qırım platformasına» qol tuttı.
ABD, Poloniya ve bir sıra memleket, şu cümleden Rusiye bu platformağa qol tuttı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
