Link açıqlığı

Eger de Hayser Cemilevni Rusiye qanunları boyunca mahkeme etseler, babası Mustafa Cemilev Avropa mahkemesine muracaatta bulunacaq


Qırımtatarlarnıñ lideri, Ukraina halq deputatı Mustafa Cemilev, eger de Qırımda apiste bulunğan ve Ukraina vatandaşı olğan oğlu Hayserni Rusiye qanunlarına köre mahkeme etseler, şikâyeti ile insan aqları boyunca Avropa mahkemesine muracaat etecek.

Bunı Cemilev Qırım.Aqiqatqa bildirdi.

Onıñ sözlerine köre, şikâyet adaletli mahkeme aqqınıñ bozuluvı ile bağlı olacaq.

«Ebet, biz Avropa mahkemesine muracaat etecekmiz. İşğalciler tarafından böyle areketler Ukraina, Rusiye qanunlarınıñ, halqara qaideleriniñ bozuluvını belgiley», – dey Cemilev.

O şunı da qayd etti ki, onıñ oğlunı Qırımda reine kibi tutalar. Böyleliknen milliy liderniñ Rusiye tarafından yarımadada etilgen areketlerge olğan munasebetine tesir etmege isteyler.

Şimdi öldürüve qabaatlanğan Hayser Cemilev Bağçasaraynıñ vaqtınca keçindirüv izolâtorında buluna. Onıñ adliyecisi taqiqat işleri devam ete, amma mahkeme ne vaqıt olacağı belli olmağanını bildire.

Hayser Cemilev 2013 senesi mayıs 27 künü Bağçasaray evinniñ azbarında yaqalanğan edi. Hayser Cemilevni yaramazlıq sebebinden yapılğan öldürüvde qabaatlaycaq oldılar. Madde cezası 10-15 yılğa qadar azatlıqtan marum etüvni belgiley.


Yarımadanıñ işğalinden soñ Hayser Cemilevniñ işini Qırım «prokuraturasına» «hatalarnı tüzetmek içün» yolladılar.

Bunıñnen beraber mayıs 15 künü Rusiye uquq qorçalayıcıları Hayser Cemilevniñ işi boyunca taqiqatlarğa inanmağanını aytıp, halq deputatı Mustafa Cemilevniñ evinde tintüvni keçirdiler.
XS
SM
MD
LG