Rusiye kontroli altındaki Ermeni Bazar şeer mahkemesi dekabrniñ 4-nde olıp keçken oturışuvda Qırımda ğıyabiy şekilde mahküm etilgen qırımtatar halqınıñ lideri Mustafa Cemilevniñ davası boyunca eki qabaatlav şaatını sorğuğa çekti, dep bildire Qırım.Aqiqat.
Eki şaat Qırım ve Herson vilâyetiniñ memuriy sıñırında Rusiye keçiş noqtasında hızmet etken edi. Qabaatlav tarafınıñ ricasınen soyadı Knâzev olğan şaatnıñ sorğusından soñ mahkeme tahqiqat vaqtında bergen şaatlığını seslendirdi, ekisi arasında farqlar bar edi.
Neticede şaat mahkemede bergen malümatı doğru olğanını aytıp, «2014 senesi mayısnıñ 3-nde Mustafa Cemilevni körmedi», dep bildirdi.
Cemilevniñ advokatı Nikolay Polozov bildirgenine köre, qabaatlav şaatınıñ malümatı farqlı olğanı içün prokuror eski şaatlığını seslendirmege rica etti.
«Şaatlıq seslendirildi, bundan soñ şaatqa bir sıra ilâve sual berildi, o, cevap berip, mahkemede aytqanları doğru dedi», – dep ayttı advokat Nikolay Polozov.
Advokatnıñ aytqanına köre, bugün sorğuğa çekilgen Lışçik soyadlı ekinci şaat 2014 senesi mayısta memuriy sıñırda Mustafa Cemilevni kördi, dep ayttı.
«Şaat Lışçikniñ mahkemede bergen malümatına köre, 2014 senesi mayısta o, Ermeni Bazar şeeri yanındaki keçiş noqtasında hızmet etti ve mayısnıñ 3-nde saba olarğa Mustafa Cemilev keçiş noqtasına kele bile degen malümat berildi. O künü Mustafa Cemilevniñ insanlarnen laf etkenini kördi. Faqat Mustafa Cemilevniñ vesiqaları teşkerildimi ya da yoq, şaat aytıp olamadı», – dep qoştı Polozov.
Bu dava boyunca nevbetteki oturışuv dekabrniñ 24-ü belgilendi.
Bir kün ögüne Cemilevniñ davası boyunca mahkeme oldı, eki qabaatlav şaatı videokonferentsiya bağı vastasınen sorğuğa çekildi.
Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.
Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
