Qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarovğa qarşı "davalarnı" alıp barğan Rusiye tahqiqatçısı qabarcılıqta şübheli sayılıp apiske alındı, dep bildirdi advokat Nikolay Polozov Facebook saifesinde.
Polozovnıñ malümatına köre, laf Qırımdaki Rusiye Federatsiyası Tahqiqat komitetiniñ Baş tahqiqat idaresiniñ pek müim davalarnıñ tahqiqat idaresiniñ sabıq üyken tahqiqatçısı Magomed Magomedov aqqında kete.
Qarar Moskvanıñ Basmannıy rayon mahkemesi tarafından alındı. Magomedov apiske alınğanda tahqiqat idaresinde çalışmay ve advokat statusını taşıy edi. Şimdi SİZOda buluna.
"Magomed Magomedov Rusiyede yasaqlanğan "Qırımtatar Milliy Meclisi" teşkilâtınıñ liderleri Mustafa Cemile ve Refat Çubarovğa qarşı (ekisi de Rusiyede ğıyabiy şekilde mahküm etildi) cinaiy davalar sebebinden meşur oldı. Ukrayinada Rusiye Tahqiqat komitetiniñ sabıq tahqiqatçısına qarşı cinaiy dava açıldı. O, cenk qanunları ve ananelerini bozğanında (Ukrayina Ceza kodeksiniñ 438-inci maddesiniñ 1-inci qısmı) bozğanında qabaatlana. Çubarov Magomedovnı "vaqtınca işğal etilgen Qırımda eñ qorqunç Rusiye cezalayıcılarından biri dep adlandırğan edi", – dep yaza Polozov.
Rusiye Federatsiyası tahqiqatınıñ malümatına köre, qabarcılıqtan ğayrı, davada çekip alınğan paralarnıñ hırsızlaması baqıla.
Refat Çubarov ve Mustafa Cemilev bu haberni izaatlamadılar.
2022 senesi aprelniñ 22-nde Rusiye kontrolindeki Ermeni Bazar şeer mahkemesi qırımtatar halqınıñ lideri Mustafa Cemilevge qarşı ğıyabiy üküm çıqardı. O, qabaatlı tanıldı, amma cezadan azat etildi. Rusiye prokuraturası mahkeme qararınen razı olmayıp, Cemilev içün kerçek bir apis cezası berilmesini talap etti.
Mayısta Rusiye kontrolindeki Qırım Yuqarı mahkemesi qırımtatar halqınıñ lideri Mustafa Cemilevniñ ğıyabiy ükmüni sertleştirip, onı 3 yıl apis cezası ve para cezasına üküm etti.
Qırım Muhtar Cumhuriyeti ve Aqyar prokuraturası haber etkenine köre, Ukrayina mahkemesine Mustafa Cemilevni taqip etken Qırımdaki Rusiye qadısına qarşı 20 qabaatlayıcı akt yollandı.
Ukrayina Tış işler nazirligi qırımtatar halqınıñ lideri Mustafa Cemilevge qarşı ğıyabiy ükümni "fars" dep saya.
2021 senesi martnıñ 5-nde Qırımdaki mahkeme oturışuvında Cemilevniñ Qırımğa kiriş yasağı 15 yılğa uzatıldı, dep haber etildi – 2034 senesi martnıñ 5-ne qadar.
2021 senesi iyünniñ 1-nde Qırımdaki Rusiye mahkemesi Çubarovğa 6 yıl azatlıqtan marum etüv ğıyabiy ükümni çıqardı, 200 biñ ruble para cezasına ve 2014 senesi fevralniñ 26-nda Qırım parlamenti ögünde "qabalıqlar" qabaatlavınen tüzetüv işlerine üküm etti. Sentâbr ayında Soçideki Üçünci istinaf mahkemesi (Rusiye) Çubarovnıñ ğıyabiy ükmüni deñiştirmedi.
Çubarov Qırım.Aqiqatqa izaat berip, ükümni "uquq ceetinden boş" dep adlandırdı.