Qırımtatar halqınıñ lideri, Ukrayina millet vekili Mustafa Cemilev Çehiya parlametiniñ temsilcilerini qırımtatar halqınıñ sürgünligini soyqırım aktı dep tanımağa çağırdı. Bunı o noyabrniñ 25-nde Ukrayina prezidentiniñ Qırım MC daimiy temsilciliginiñ Çehiya parlament azaları ile körüşüvi vaqtında ayttı.
"Ukrayina millet vekili Mustafa Cemilev fırsattan faydalanıp Çehiya parlamentini 1944 senesi qırımtatar halqınıñ sürgünligini soyqırım aktı dep tanımağa çağırdı", - dep haber ettiler Temsilcilikte.
Körüşüvde Çehiya Senatınıñ başı Miloş Vıstriçil ve Çehiya Millet vekilleri palatasınıñ reisi Marketa Pekarova Adamova ve Çehiya parlamentiniñ eki palatasınñ da temsilcileri bar edi. Episi olıp, körüşüvde Çehiya delegatsiyasından 20 adam iştirak etken.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
