Al-azırda Qırımnı işğalden qurtarmaq içün tek cenk yolu qala, dep bildirdi qırımtatar halqınıñ lideri Mustafa Cemilev Qırım.Aqiqat intervyüsında.
Onıñ hatırlatqanına köre, 2022 senesi fevralniñ 24-ne qadar Qırımnı işğalden qurtarmaq içün barışıq, siyasiy-diplomatik usulları aqqında laf kete ve esas usul Rusiyege qarşı ğarbiy sanktsiyalarnı quvetleştirmek edi. Rusiyeniñ Ukrayınağa qarşı büyük istilâsı başlağan soñ bile Qırım meselesini barışıq yolnen çezmege soñki kere tırıştı.
«Ukrayına tarafı 2022 senesi mart ayında İstanbulda Rusiye eyyeti ile muzakerede Rusiyege 2022 senesi fevralniñ 24-ne qadar olğan ordusını keri çekmege, bir qaç yılda olarnı azat etmek içün küç qullanmağa vade etmeyip, Qırım ve Donbas meselesini ise ilerideki muzakereniñ mevzusı yapmağa teklif etti. Amma Rusiye tarafı bu teklifni de red etti, Qırım «Rusiye toprağı» ola ve muzakere etilemez, dep bildirdi», – dep tarif etti Cemilev.
Onıñ aytqanına köre, «Rusiye arbiyleri işğal altındaki topraqlarda yapqan cinayetlerden soñ Ukrayına deliller ketirip ve mantıqqa uyğun bir qarar aldı, cenk cinayetçileri ve terroristlernen bir muzakere yapılmaz dep».
«Şunıñ içün, ne yazıq ki, azat etüvniñ tek cenk yolu qala. Şübhesiz ki, Qırımnı memleketine, vatanına sadıq qalğanlar elinden kelgeni qadar azat etecek, tek qırımtatarlar degil, olarnıñ daa çoq sebebi bar ve bu yıllar devamında olar eñ çoq zarar kördi», – dep ayttı qırımtatar halqınıñ lideri.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
