Link açıqlığı

Cemilev: Bayraq Künü keçirilmesi içün izin berilmegeni qırımtatarlarnıñ kelmeycegini bildirmey


Qırımtatarlarnıñ milliy lideri, halq deputatı Mustafa Сemilev Qırım «akimiyeti»niñ yasaqları qırımtatarlarğa Milliy bayraq Kününi qayd etmege mania olmaycağını ayttı.

Bunı o Dnepropetrovskta bildirdi, dep haber ete Ukrinform.

«Başta olar Aqmescitte milliy matem kününi – qırımtatarlarnıñ sürgünliginiñ 70 yıllığı munasebeti ile er yıllıq mitingini keçirmege izin bermediler. Bunı terroristlerniñ tarafından ola bilecek areketleri ile añlattılar. İyün 26-da keçirilmesi planlaştırılğan Bayraq Künü ile aynı öyle vaziyet. Faqat, bu yasaq qırımtatarlarnıñ öz milliy bayraq kününde toplanmaycağını belgilemey», – dedi Cemilev.

Onıñ fikrince, işğalci akimiyet qırımtatarlarnıñ toplaşuvlarını sıñrılamaq içün ep areket etecektir. Çünki olarnıñ yüzünde birleşken küçni ve özü içün telükeni köre.

Evel işğal etilgen Qırımda Mecliske iyün 26-na Aqmescitniñ Trenöva bağçasında keçirilmesi planlaştırılğan Qırımtatar bayraq Kününi keçirmege ruhset bermediler. Bu qararnı bağçağa kelgen «yüzlernen balalarğa» telüke ola bilecegi ile añlattılar.

Malüm olğanı kibi, Qırım «akimiyeti» Aqmescit merkezinde sürgünlik qurbanlarınıñ hatırasına bağışlanğan matem mitingini keçirmege yasaq etken edi.

Qırım.Aqiqat bergen malümatına binayen, Cemilev «Rusiye prezidenti Vladimir Putinni şahsiy seviyede kendi duşmanı olaraq saymay» eken.
XS
SM
MD
LG