Qırımtatar halqınıñ milliy lideri Mustafa Cemilev, Rusiyeniñ nezaretinde olğan Qırımnıñ yolbaşçısı Sergey Aksönov ve Qırımnıñ Rusiye parlamentiniñ spikeri Vladimir Konstantinov ailelerini Kırım yarımadasınadn alıp çıqarğanlarını bildire. Bunı Cemilev Qırım.Aqiqatqa bildirdi.
''Maña Aksönov ve Konstantinovqorantalarını çıqardı, dep aytqanlar. FSB hadimleri de insanlarını çıqardı. Bu güzel bir işaret'', - dedi Cemilev.
Öz nevbetinde Qırımnıñ Rusiye parlamentiniñ mesleatçısı Oleg Krüçkov Cemilevniñ aytqanlarına cevap berdi.
"Qırımnıñ qaçqan reberligi ve olarnıñ aileleri" ile bağlı sayma haberlerni red etmek aceti yoq. Episi cemiyetke belli adamlar ve olarnı er kün haber vastalarında körmek mümkün, olar rayon, şeerlerge barıp adamlarnen korbşeler", - dep yazdı Krüçkov.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
