«Qırımlı musulmanlar davası» boyunca 13 yılğa üküm etilgen qırımlı Cemil Gafarovğa tibbiy tedqiqler yapılmay.
Bu aqta advokatı Emil Kurbedinov «Qırım birdemligi» cemaat birleşmesine bildirdi.
«O, alı yaramay, künde eki kere tutuvlar ola, dep ayta; tünevin qan talili zornen alındı, olarğa qaç kere ayttı ve eki künden berli qannı talilge alıp ketmeyler (bina yanında buluna). Bir ilâc bermege tırışalar, amma olarnı içmek içün ekimden büyreknen bağlı tevsiyeler almaq kerek, çünki büyrek yetersizligi bar, berilgen yürek ilâcı büyreklerge tesir ete bile. Laf etkende turmay bile», – dep bildirdi Kurbediinov.
Cemil Gafarovnıñ fikirince, onı tedaviylemeycekler ve Rusiye koloniyasına etap etilüvini bekley.
«Etapta sağ qalacammı-yoqmı belli degil. Meni aylarnen nasıl etap etecekler? Yolda pek zor olur», – dep bildire Gafarovnıñ aytqanlarını «Qırım birdemligi».
Yanvarniñ 13-nde «Qırım birdemligi» qırımlı advokatlarnıñ aq qorçalayıcı ofisiniñ malümatına esaslanıp, «qırımlı musulmanlar davası» boyunca mahküm etilgen siyasiy mabüs Cemil Gafarovnıñ sağlıq vaziyeti «birden fenalaştı», dep bildirdi.
Mabüsniñ ömür arqadaşı Raziye Gafarovanıñ aytqanına köre, cinaiy dava açılmazdan evel, 2017 senesi, keniş miokard infarktı oldı. O yıl büyrek yetmezligi aqqında aytqanlar. Siyasiy mabüs büyreklerniñ dializine muhtac, SİZO şaraitlerinde bunı yapmaq imkânsız.
Rusiye Cezalarnı yerine ketirüv federal hızmeti Gafarovnıñ advokatları ve tuvğanları bergen malümatnı izaatlamay.
Yanvarniñ 11-nde «qırımlı musulmanlar davası» boyunca qabaatlanğan qırımtatarlar Alim Karimov, Seyran Murtaza, Erfan Osmanov, Cemil Gafarov ve Servet Gaziyev Rusiye mahkemesi tarafından 13 yılğa azatlıqtan marum etildi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri Alim Karimov, Seyran Murtaza, Erfan Osmanov, Cemil Gafarov ve Servet Gaziyevniñ evlerini tintip, olarnı tuttı. Umumen 20-den çoq insan tutuldı. 2019 senesi martnıñ 27-nde ve 28-nde Aqmescitniñ Rusiye rayon mahkemesi episini apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan qırımtatar faallerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
