Vlasihadaki Rusiye arbiy istinaf mahkemesi «Hizb ut-Tahrir davasındaki» «ekinci Aqmescit gruppasınıñ» mabüslerine ükümlerini deñiştirmedi. Olarnı 13 yıl sert rejimli koloniyada qalmalarına üküm etkenler. Bu aqta «Qırım birdemligi» haber ete.
Laf Servet Gaziyev, Alim Karimov, Seyran Murtaza, Erfan Osmanov ve Novoçerkassk SİZOsında vefat etken Cemil Gafarov aqqında kete. Advokat Emil Kurbedinovnıñ aytqanına köre, Gafarov sağ olğanda ükümge qarşı itiraz bildirip oldı.
İmayeci qayd etkenine köre, daa evel mahkeme «qanun ve halqara uquq normalarına qulaq asmayıp» üküm çıqardı. Kurbedinovnıñ aytqanına köre, em tahqiqat, em mahkeme vaqtında qabaatlanğanlarnıñ aqları bozuldı.
Qayd etilgenine köre, Rusiye mahkemesi 63 yaşında Servet Gaziyevge söz bermedi. O, qırımtatarca aytıp, terciman talap etti.
Advokat Gaziyev insult keçirgen soñ sağlığı zayıflaştı, dep qayd etti. Tibbiy yardım almay, yapılğan bir şey bar – ağrısını kesken ineler.
«Servet Gaziyev insulttan soñ işkence ve zorbalıqqa oğray. Apishane hastahanesinde tibbiy yardım yerine omurğasına zarar ketirgenler, sağlığı daa beter zayıflaştı. O, Allahqa şükür, ayatı içün küreşmege devam ete, cinayet yapqanlar ise alâ daa azatlıqta qala ve zorbalıq yapmağa devam ete, işkence yapa, repressiyalarğa oğrağanlarnı, olarnıñ qorantalarını ve zaten öksüz qalğan balalarını çekiştire», – dedi Erfan Osmanov.
Davanıñ diger mabüsi Alim Karimov «apishanelerden eñ sertinde eki ömür boyu apis cezası berilse bile, gulaglarda» ölmege azır, amma Rusiye akimiyetiniñ «yalanına razı olmayjaq, dep ayttı.
Advokat imaye tarafı temyiz arizasını berecek, dep bildirdi. Onı da qanaatlendirmeseler, mabüsler halqara qurulışlarğa muracaat etecek.
Fevral ayında Qırımlı aq qorçalayıcılar Rusiye tarafından «qırımlı musulmanlar davasına» istinaden mahküm etilgen ve siyasiy mabüs dep tanılğan qırımlı Cemil Gafarovnıñ Rusiye SİZOsında vefat etkeni aqqında bildirdi.
Aqmescit rayonındaki Mamaq köyüniñ sakini Cemil Gafarov dört yıldan berli Rusiye apsinde yattı. Bu yıl yanvarniñ başında Rostov-na-Donu Cenübiy okrugınıñ arbiy mahkemesi «25-niñ davası» olaraq belli cinaiy dava boyunca 13 yılğa azatlıqtan marum etildi. Dava çerçivesinde Rusiye uquq qoruyıcıları 25 qırımlı musulmannı terrorizmde qabaatladı, çoqusı apiske alınmazdan evel faal vatandaş edi, «Qırım birdemligi» cemaat birleşmesi çerçivesinde faal ve vatandaş jurnalistleri olaraq belli edi.
Cemil Gafarovnıñ sağlıq problemleri apiske alınmazdan evel de bar edi. Üçünci derece saqatı edi. Ömür arqadaşı Raziye Gafarovanıñ aytqanına köre, qırımlınıñ dördünci derece büyrek yetersizligi, gipertoniya ve yürek hastalığı bar. O, miokard infarktını keçirdi ve SİZO şaraitlerinde olmağan büyrek dializine ihtiyacı bar edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
