Yaltadaki «Hizb ut-Tahrir davası» boyunca mahküm etilgen Arsen Cepparovğa Rusiye tahqiqat izolâtorında anda Cemaat nezaret komissiyasınıñ azaları kelgen soñ tibbiy yardım kösterildi. Bu aqta advokat Ayder Azamatov yanvarniñ 28-nde bildirdi.
«CNK kelgen soñ Arsenni ekimge baqtırğanlar, qulağınıñ arqasında endi irinlegen çibannı kesip çıqarğanlar, bağlağanlar, tedaviylevini aytıp, antibiotik bereler. Adiy söznen aytacaq olsa, «SİZO hadimleri istese yapar». CNK reisi, Cepparov Arsenniñ sağlıq vaziyetiniñ monitoringi içün yaqın vaqıtta SİZOğa kene komissiya yollaycaq, dep qoştı», – dep bildirdi Azamatov.
Advokat Qırım.Aqiqatqa izaat berip, tibbiy yardım ekimler tarafından SİZOda kösterildi, müvekkili hastahanege alıp ketirilmedi, dep qayd etti.
Advokat Ayder Azamatov, müvekkili – Yaltadaki «Hizb ut-Tahrir davasınıñ» mabüsi Arsen Cepparovğa kerekli tibbiy yardım kösterilmey dep, Rostov vilâyetiniñ Şahtı şeerindeki SİZO-4 hadimleriniñ areketsizligini şikâyet etmek içün yanvarniñ 20-nde Rusiye Baş prokuraturası, Rostov vilâyetiniñ prokuraturası ve Rostov vilâyetindeki Rusiye Cezalarnı yerine ketirüv federal hızmeti Baş idaresine bir sıra ariza yolladı.
SİZOda Cepparovnıñ sağlığı içün olğan telükeler aqqında advokatı daa evel de bildirgen edi, Ukraina ombudsmeni Lüdmila Denisova ise Rusiye zenaatdaşı Tatyana Moskalkovağa muracaat etip, acele tedbip almasını talap etti. Lâkin Moskalkova daa cevap bermedi.
Bu malümat diger menbalarda tasdıqlanmay. SİZO reberliginiñ de izaatları yoq.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
