Link açıqlığı

Saatnıñ esas haberi

Rusiye quvetçileri qırımtatarlarğa celpnameler bere – Taşeva


Tamila Taşeva
Tamila Taşeva

Qırımda Rusiye arbiy komissarlıqları qırımtatarlar toplu yaşağan yerlerde kütleviy sürette celpnameler bere, dep haber etti Facebookta Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva.

«Tünevin ve bugün qırımtatarlar toplu yaşağan yerlerde mektep, bazar, «Krımopt» (çalışqanlarnıñ çoqusı qırımtatarı), insanlar toplaşqan yerlerde reydler keçirile. Celpnameler berile, sıq-sıq maşinalarğa mindirip, arbiy komissarlıqlarğa alıp keteler. Yaş – 18-50. Menbalarımıznıñ aytqanına köre, tutulğan erkekler bildirgeni kibi, bir hastalıqqa baqmay, «er kes kelişe» dep aytalar. Meselâ, Zuya qasabasında tahminen 100 er adamına, qırımtatarğa celpname keldi. Zuya mektebine kirip, er adam ocalarına celpname bergenler. Qalay (Azovskoye) ve Mayskoye qasabalarında, Mamut Sultan (Dobroye) ve qırımtatarlar çoq yaşağan o taraflarda, Çoyunçı (Urojaynoye), Mamaq (Strogonovka) ve diger köylerde celpnameler faal sürette berile», – dep bildirdi Taşeva.

Onıñ menbası bildirgenine köre, al-azırda Qırımda tahminen 1000 celpname berildi.

Taşeva Rusiye akimiyetiniñ yapqanlarını «bu yıllar devamında işğalcilerge qoltutmağan ve Ukrayına silâlı quvetlerini faal sürette desteklegen» «qırımtatarlarnı cezalağanını kösterüv aktsiyası» dep adlandırdı. Onıñ aytqanına köre, «seferberlik qullanıp, qırımtatarlarnı yoq etmege isteyler».

İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı. «Krım – kray partizansköy slavı» Telegram kanalı bildirgenine köre, Qırımda Rusiye quvetçileri «celpnamelerni daa faal berip başladı».

Sentâbrniñ 22-nde Aqmescitniñ Rusiye arbiy komissarı Aleksandr Çepurenko Qırımda Rusiye ordusı «bütün mütehassıslarğa muhtac», şunıñ içün «er kesni alalar», dep bildirdi.

Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi. Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa. Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.

Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG