Rusiye mahküm etken Nariman Celâl, Asan ve Aziz Ahtemovlarnıñ ömür arqadaşlarını SİZOğa kirsetmeyler, dep haber ete «Qırım birdemligi» cemaat birleşmesi. Olar advokatlarnen beraber cemaat imayecileri olaraq mahkemede menfaatlarını temsil ete.
Leviza Celâlova qayd etkenine köre, mahkeme tahqiqatı daa yekünlenmedi – imaye tarafı ve qabaatlanğanlar şikâyet yollaycaq olalar. Cemaat imayecileri Celâl i Ahtemovlarğa kele bile, çünki «olarnıñ imayege ihtiyacı bar».
«Pek külkünçli, firqa kibi. Aqaylarımızğa kelgende mahsus bölükte talaplar berildi, SİZOğa kireyik dep, kiriş izinleri berildi. Nevbetçi bölük bizni yahşı bile. İstinaf keçkenini bileler. Bir saat turdıq. Soñra nevbetçi qadınnen çıqıp ayta: «Sizni kirsetmeycekmiz. Şimdi mahsus bölükten telefon etip, sizni kirsetmek yasaq». Bütün kerekli vesiqalarımız bar edi, nevbetçi kimler kirecek, kimler yoq qarar almay», – dep tarif etti Celâlova.
Celâlnıñ ömür arqadaşı olar memuriy binağa qaytıp, mahsus bölükke kirgenler, amma kirmege yasaq olğanına dair bir vesiqa köstermediler.
«Kantselâriyadaki qızlar Yuqarı mahkeme hadimlerinen pek sıqı bağdalar. Biz olarğa birinci instantsiya mahkemesi qararınıñ pek tez yaramay, qıyış kopiyasını yollağanlar, sılaq müir qoyğanlar, ve bizni bu vesiqa esasında kirsetmediler, dep tahmin etemiz. Amma bizge onı öyle de köstermediler… Er kes añlay, bu vesiqa resmiy degil, delilleri yoq, amma emir bar – kirsetmemek», – dep qoştı Celâlova.
İyülniñ 27-nde Rusiye kontrolindeki Qırım Yuqarı mahkemesiniñ binası ögünde Rusiye uquq qoruyıcıları Celâl ve ağa-qardaş Ahtemovlarğa qoltutqan insanlarnı tutqanlar. Olarnıñ arasında – «Qırım birdemligi» jurnalistleri ve aq qorçalayıcı Lutfiye Zudiyeva.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
