Qırımtatar Milliy Meclis reisiniñ birinci muavini, Kremlniñ sabıq reinesi Narima Celâl sentâbrniñ 6-ndan 8-ne qadar işğal etilgen Qırımda keçirilgen qanunsız Rusiye saylavlarını izaatladı.
Onıñ aytqanına köre, cuma künü bücet müessiseleriniñ hadimleri rey bersin dep işten yiberildi. Müessise reberleri hadimlerine faal sürette telefon etip, rey bergenini isbatlaycaq foto delillerini yollamağa talap etti.
«Rey berüvniñ ilk eki künü neticesinde saylayıcılarnıñ 26%-ı iştirak etti. Niayet, üç kün devamında bütün ğayretni sarf etip, Qırımda «istegen» ve «mecbur olğanlarnıñ» 44,51%-ına irişkenler. Aqyarda tek 49,05%», – dep yazdı Meclis reisiniñ muavini.
Celâlnıñ aytqanına köre, Rusiye akimiyeti iştirak etkenlerniñ sayısı az olğanını saylavlarnıñ «demokratik» olmasınen añlatmağa tırışacaq, amma bu yalan ola.
Rusiye akimiyeti sentâbrniñ 6-ndan 8-ne qadar işğal altındaki Qırım ve Aqyarda Rusiye qurğan Qanun çıqarıcı toplaşuv, Rusiye kontrolindeki Qırım parlamenti, şeer ve köy şuralarınıñ deputatları qanunsız saylavlarını keçirdi.
Bu sahte saylavlarda resmiy halqara közeticiler yoq edi. Halqara toplulıq, BM, OSCE ve diger teşkilâtlar bu saylavlarnı, netice ve deputatlarını tanımaylar.
Qırımdaki Rusiye akimiyeti bildirgenine köre, sentâbrniñ 8-nde saba yarım milliondan çoq insan Rusiye teşkil etken Qırımnıñ Rusiye parlamenti, şeer ve köy şuralarınıñ deputatları qanunsız saylavlarında iştirak etti.
Ukrayina Tış işler nazirligi Qırım ve Aqyarda Rusiye saylavlarınıñ keçirilüvini izaatlap, bu halqara uquq norma ve temellerini bozuv ola ve bu rey berüv qanunsız ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
